Maliyyə

Maliyyə

Gələn il iki xarici strateji investor «Rabitəbank»ın səhmdarı olacaq

01 dekabr 2010 14:05 (UTC +04:00)

«APA-Economics» xəbər verdiyi kimi, bunu AYİB-in Bakı ofisinin rəhbəri Frensis Delay bildirib.

F.Delay həmçinin EBRD və IFC-nin hər birinin «Rabitəbank»ın nizamnamə kapttalında 12,5%-lik səhm paketi almaq niyyətində olduğunu bildirib. Hazırda iştirak payının alınması ilə bağlı tərəflər arasında abunə şərtlərinə dair danışıqlar aparılır və «Rabitəbank» tərəfindən şərtlərə razılıq verilərsə, hər iki beynəlxalq maliyyə təşkilatı artıq gələn il Azərbaycan bankının səhmdarları sırasına daxil olacaq.

Xatırladaq ki, «APA-Economics» hələ bu ilin oktyabr ayında «Rabitabank» ASC nizamnamə kapitalında iştirak payının bir hissəsinin IFC və EBRD-yə satılmasına dair bu strateji investorlarla ilkin müqavilə imzaladığı barədə məlumat yayıb.

Razılaşmaya əsasən, «Rabitabank»ın nizamnamə kapitalında 12,5%-lik iştirak payı IFC-yə, daha 12,5% isə EBRD-yə satılacaq. Bununla əlaqədar, bankın nizamnamə kapitalının əlavə səhm emissiyası vasitəsilə 3,5 mln. manat artırılması nəzərdə tutulub. Səhmlərin alqı-satqı prosesi tam yekunlaşdıqdan sonra bankın nizamnamə kapitalı 35% artaraq 13,5 mln. manata çatacaq.

Qeyd edək ki, səhmlərin qalan hissəsi yerli hüquqi və fiziki şəxslərə məxsusdur.

Xatırladaq ki, «Rabitəbank» ASC 1993-cü ildən fəaliyyət göstərir. Cari ilin oktyabr ayının 1-nə bankın aktivlərinin həcmi 116,876 mln. manat, depozit portfeli 63,805 mln. manat, kredit portfeli 80,827 mln. manat, məcmu kapitalı 13,116 mln. manat, o cümlədən nizamnamə kapitalı 10,103 mln. manat təşkil edib. Bankın hazırda 20 filialı, 27 bankomatı və 129 POS-terminalı mövcuddur.