Maliyyə

Maliyyə

Hesablama Palatası büdcə vəsaitlərinin istifadəsini araşdırıb

06 dekabr 2010 11:32 (UTC +04:00)

Bakı. Əli Əhmədov - APA-Economics. Hesablama Palatasının 2010-cu il dekabr ayının 3-də keçirilən Kollegiya iclasında dövlət büdcəsindən və büdcədənkənar daxilolmalardan müxtəlif dövlət qurumlarına ayrılan vəsaitlərin necə istifadə olunduğu araşdırılıb.

Palatadan «APA-Economics»ə verilən məlumata görə, kollegiyada Standartlaşdırma, Metrologiya və Patent Komitəsinin saxlanılmasına, Dövlət büdcəsinin “Mənzil və kommunal təsərrüfatı” bölməsindən Nəsimi rayon İcra Hakimiyyətinin Mənzil-Kommunal Təsərrüfatı Birliyinə ayrılan vəsaitlərin istifadəsi üzrə auditin nəticələri müzakirə olunaraq təsdiqlənib.

Müzakirə olunan məsələlərin bir hissəsi Ekologiya və Təbii Sərvətlər Nazirliyi (ETSN), eləcə də ekoloji tədbirlərin maliyyələşdirilməsi ilə bağlı olub. Belə ki, iclasda dövlət büdcəsindən ETSN aparatının saxlanılmasına, “Azərbaycan Respublikasında ekoloji vəziyyətin yaxşılaşdırılmasına dair Kompleks Tədbirlər Planı” üzrə Sumqayıt Səthi Aktiv Maddələr Zavodunda xlorun alınmasında əmələ gəlmiş civə tərkibli tullantıların təhlükəli tullantı poliqonuna daşınması və zərərsizləşdirilməsinə, Bakı şəhəri, B.Ağayev küçəsi, 100 “A” ünvanında yerləşən inzibati binanın əsaslı təmirinə ayrılan vəsaitlərin və “Təxirəsalınmaz ekoloji tədbirlər” layihəsi üzrə Dünya Bankından hökumət zəmanəti ilə cəlb edilən kreditin istifadəsinin, dövlət büdcəsinin “Meşə təsərrüfatı” və “Faydalı qazıntılar” köməkçi bölmələrindən Azərbaycan Respublikası Ekologiya və Təbii Sərvətlər Nazirliyinin Meşələrin İnkişafı Departamentinə və Milli Geoloji Kəşfiyyat Xidmətinə ayrılan vəsaitlərdən istifadənin vəziyyəti üzrə auditin nəticələri müzakirə edilərək təsdiqlənib.

Palatanın iclasında dövlət mülkiyyətində olan torpaqların istifadə vəziyyəti də araşdırılıb, bununla bağlı hesabatlar təsdiqlənib. Habelə Dövlət Sosial Müdafiə Fondunun Astara rayon şöbəsinin gəlir və xərclərinin proqnozlaşdırılması və icrası üzrə auditlərin nəticələri üzrə hesabat və rəylər geniş müzakirə olunaraq təsdiq edilib. Kollegiyanın qərarları barədə Azərbaycan Milli Məclisinə məlumatların verilməsi barədə qərar qəbul edilib. İclasda həmçinin Hesablama Palatasınıın 2011-ci il üçün İş Planı da təsdiqlənib.