Maliyyə

Maliyyə

BVF: Gələn il Qafqaz və Mərkəzi Asiya ölkələrində iqtisadi artım 5,4% olacaq

09 dekabr 2010 14:00 (UTC +04:00)

«APA-Economics»in məlumatına görə, hesabatı təqdim edən BVF-nin Yaxın Şərq və Mərkəzi Asiya üzrə iqtisadçısı Niklas Vestelius qeyd edib ki, bütün QMA ölkələrində maliyyə stimulları və münbit xarici amillər sayəsində iqtisadi artım müşahidə olunur: «Bu artım Rusiya və digər neft-qazla zəngin olan ölkələrdə daha qabarıq hiss olunur. Ümumi müsbət tendensiyalar fonunda gizli risklər mövcuddur və adam başına düşən gəlir göstəricisinin 2009-cu ildən əvvəlki həddə qayıtması üçün bir müddət vaxt lazımdır».

İqtisadi artımın daha da sürətləndirilməsi üçün maliyyə sektorunda tövsiyə olunan addımlardan danışan N.Vestelius həmçinin bildirib ki, QMA regionunda 2010-cu ilin sonunda neft-qaz ixrac edən ölkələrdə iqtisadi artım tempinin təxminən 6%, idxalçı ölkələrdə isə 3,4% olacağı proqnozlaşdırılır, ümumilikdə isə regionda iqtisadi artımın bu il 5,7%, gələn il 5,4% təşkil edəcəyi gözlənilir: «Ümumiyyətlə, regionda neft-qaz ixrac edən ölkələrdə ixracın həcmi böhrandan öncəki həcmə çatmayıb, halbuki idxalçı ölkələrin neft və qaz idxalında böhrandan əvvəl olan həcmlər müşahidə olunur».

Böhranın artıq geridə qalmasından danışan BVF rəsmisi qeyd edib ki, böhranın ikinci dalğası qeyri-mümkündür, lakin müəyyən riskləri aradan qaldırmaq üçün müvafiq tədbirlər görülməlidir.

Dünyada neft və taxıla olan qiymətlərə toxunan N.Vestelius həmçinin bildirib ki, 2011-ci ildə neftin qiymətinin 80 dollar/barelə çatacağı proqnozlaşdırılır: «Eyni zamanda, gələn il taxılın istehsalında artım gözlənilir ki, bu da öz növbəsində bu məhsula olan qiymətləri tarazlaşdıracaq».

Hesabatda həmçinin bildirilir ki, ötən il Azərbaycanda ümumi daxili məhsulun (ÜDM) nominal həcmi 43,1 mlrd. dollar təşkil etdiyi halda, 2010-cu ildə bu göstəricinin 52,2 mlrd. dollara, 2011-ci ildə isə 57,9 mlrd. dollara çatağacı gözlənilir.

BVF həmçinin cari ildə Azərbaycanda ÜDM-in artım tempinin 4,3%, 2011-ci ildə isə 1,8% səviyyəsində olacağını proqnozlaşdırır: «ÜDM-in neft sektorunda artımı 2010-cu ildə 3% olacaq, 2011-ci ildə isə 1,3% azalacaq. Qeyri-neft sektorunda isə ÜDM-in artım tempinin 2010-cu ildə 5,6%, 2011-ci ildə isə 5% olacağını gözləyirik».

İnflyasiyaya gəldikdə isə Fond bu il Azərbaycanda inflyasiyanın 5,5%, 2011-ci ildə isə 6% təşkil edəcəyini proqnozlaşdırır.

Qeyd edək ki, Azərbaycan hökuməti bu il ölkədə ÜDM-in nominal həcminin 37,8 mlrd. manat (47,3 mlrd. dollar), 2011-ci ildə isə 40,2 mlrd. manat (50,3 mlrd. dollar) olacağını proqnozlaşdırır. Cari ilin yanvar-oktyabr aylarında isə ölkədə inflyasiyanın səviyyəsi 5,3% təşkil edib.