Maliyyə

Ana səhifə

Maliyyə

Gələn il Azərbaycanda yeni həyat sığortası şirkəti yaradılacaq

28 dekabr 2010 08:52 (UTC +04:00)

Bakı. Elnur Hüseynquluyev – APA-Economics. «Azərsığorta» Dövlət Sığorta Kommersiya Şirkəti 2011-ci ildə həyat sığortası üzrə ixtisaslaşmış şirkət yartmaq niyyətindədir. Bunu «APA-Economics»ə açıqlamasında şirkətin İdarə Heyətinin sədr müavini Aftandil Hacıyev bildirib.

A.Hacıyevin sözlərinə görə, gələn ilin mart ayında həyat və qeyri-həyat sığortası növləri üzrə ixtisaslaşma ilə bağlı dövlət tərəfindən sığorta şirkətlərinə verilən müddət başa çatacaq. Bu səbəbdən «Azərsığorta» artıq gələn ilin mart ayında şirkətin həyat sığortası üzrə müştərilərlə bağladığı müqavilələrin vaxtı bitəcək: «Ümumilikdə, cari ilin əvvəlindən indiyədək həyat sığortası üzrə sığorta yığımlarının həcmi 10 min manatdan çox olub. Bu növ üzrə sığorta ödənişlərinin həcmi isə 190 min manat təşkil edib».

A.Hacıyev bildirib ki, könüllü həyat sığortası növləri ilə yanaşı şirkət müştərilərə «İstehsalatda bədbəxt hadisələr və peşə xəstəlikləri nəticəsində peşə əmək qabiliyyətinin itirilməsi hallarından icbari sığorta» növü üzrə xidmətlər təqdim edəcək.

Qeyd edək ki, «Sığorta fəaliyyəti haqqında» qanun 2008-ci ilin mart ayının 15-də qüvvəyə minib. Qanuna əsasən, sığorta şirkətlərinin ixtisaslaşması (həyat və qeyri-həyat üzrə) üçün 2 il vaxt verilib.

Xatırladaq ki, «Azərsığorta» Dövlət Sığorta Kommersiya Şirkəti 1991-ci ildən fəaliyyət göstərir. Cari ilin yanvar-noyabr aylarında şirkətin topladığı sığorta haqlarının həcmi 22,80 mln. manat, sığorta ödənişləri isə 9,66 mln. manat təşkil edib. Şirkət 10 icbari və 20 könüllü sığorta növü üzrə xidmət göstərir.