Maliyyə

Ana səhifə

Maliyyə

Azərbaycanda mühasibatlıq məcburi qaydada elektron formada aparılacaq

28 dekabr 2010 14:40 (UTC +04:00)

Vergilər Nazirliyinin təşəbbüsü ilə ölkədə elektron auditin tətbiqi və bu məqsədlə mühasibatlığın tamamilə elektron formata keçməsi nəzərdə tutulur. «APA-Economics»in məlumatına görə, Vergilər Nazirliyi Vergi siyasəti və strateji araşdırmalar Baş İdarəsinin bölmə rəisi Vüsal Şıxəliyev bildirib ki, artıq müəssisələrin mühasibat uçotu və hesabatlarının elektron formada aparılmasının məcburiliyi barədə qanunvericilikdə dəyişikliklərin edilməsi üçün təkliflər hazırlanıb.

Elektron audit - səyyar vergi yoxlamasının insan resursu olmadan, elektron formada aparılmasını nəzərdə tutur. Auditin bu forması dünyanın müxtəlif ölkələrində - Fransa, Niderland, Almaniya və s.-də tətbiq olunur. Elektron auditin əsas üstünlüyü vergi ödəyicisinin yoxlanmasının çox qısa vaxt ərzində aparılmasındadır. Bunun üçün xüsusi proqram təminatlarından istifadə olunur. «Mühasibatlıq elektron formada olmalıdır ki, vergi orqanları həmin məlumatı müəyyən elektron vasitələrlə götürsün və bu proqram vasitəsilə təhlil etsinlər. Yəni, indi vergi əməkdaşları yoxlama zamanı kağız sənədlərlə işləyir, rəqəmləri və bank hesablarını yoxlayır, amma bunlar həm vaxt itkisinə səbəb olur, həm də sənədlər kağız formasında olduğuna görə, müəyyən rəqəmlərin gözdən qaçması ehtimalı da var. Elektron auditdə isə bu problemlər aradan qalxır», - deyə Nazirlik təmsilçisi bildirib.

Elektron audit yoxlaması zamanı xüsusi kompüter proqramı sahibkarın mühasibatındakı məlumatları ümumiləşdirir, təhlil edir və mühasibatlıqdakı kənarlaşmalar barədə yoxlayıcıya, yəni vergi işçisinə məlumat verəcək: «Məsələn, dövriyyənin tam göstərilməməsi, xərclərin şişirdilməsi, müəyyən gəlirlərin nəzərə alınmaması baş verdikdə həmin məlumatlar çıxarılır və qərar vermək çüün müfəttişə təqdim edilir». Artıq Vergilər Nazirliyi bununla bağlı Niderlandla bağlanmış müqavilə əsasında elektron auditin tətbiqi ilə bağlı tvinninq layihəsi həyata keçirir.