Maliyyə

Ana səhifə

Maliyyə

Azərbaycanda nağd dollar əməliyyatlarının həcmi azalır

28 dekabr 2010 14:52 (UTC +04:00)

Bakı. Vahab Rzayev – APA-Economics. Azərbaycanda əhali tərəfindən kommersiya banklarından alınan nağd ABŞ dolları kütləsinin həcmi 2010-cu ilin yanvar-noyabr aylarında 4 569 008 500 dollara bərabər olub ki, bu da 2009-cu ilin analoji 11 aylıq göstəricisindən 13,2% azdır. Azərbaycan Mərkəzi Bankından «APA-Economics»ə verilən məlumata görə, əhali tərəfindən banklar vasitəsi ilə nağd dolların satış həcmi isə yanvar-noyabr aylarında 1 116 616 700 dollar təşkil edib ki, bu da ötən ilin müvafiq dövrü ilə müqayisədə 10,8% azdır.

Nağd dollar əməliyyatlarının həcminin azalması ölkədə konvertasiya əməliyyatlarına olan tələbatın azaldığını göstərir ki, bu da öz növbəsində həm ölkədaxili işgüzarlıq fəallığı, həm də pərakəndə idxalın azalmasının nəticəsidir.

Qeyd edək ki, Azərbaycanda nağd dollara tələbat hələ də yüksəkdir. Belə ki, cari ilin yanvar-noyabr ayları üzrə əhalinin nağd dollar alışı satışın həcmini 4,1 dəfə, ötən ilin 11 ayında isə 4,2 dəfə üstələyib.

Xatırladaq ki, 2009-cu il ərzində ümumilikdə əhali 1 418,760 mln. dollar həcmində satış, 5 807,164 mln. dollar həcmində isə alış əməliyyatı aparıb və bu, əvvəlki il ilə müqayisədə müvafiq olaraq 2,5% az və 16,9% çoxdur.