Maliyyə

Ana səhifə

Maliyyə

Azərbaycanın neft-qaz sektoru üzrə ÜDM-in həcmi azalıb

23 fevral 2011 11:17 (UTC +04:00)

Bakı. Vahab Rzayev – APA-Economics. Azərbaycanda 2011-ci ilin yanvar ayı ərzində istehsal olunmuş ÜDM-in illik artım tempi 0,8%, o cümlədən qeyri-neft ÜDM-in artım tempi 6,6% təşkil edib. «APA-Economics»in xəbər verdiyi kimi, bu göstəricilər Dövlət Statistika Komitəsinin ölkənin makroiqtisadi göstəriciləri üzrə rəsmi hesabatında əks olunub. Lakin neft ÜDM-in dinamikası barədə məlumat göstərilməyib.

Belə ki, yanvar ayında ÜDM-in həcmi 3 442,5 mln. manat, o cümlədən qeyri-neft ÜDM 1 412,7 mln. manat təşkil edib. İlkin hesablamalar əsasında müəyyənləşdirmək olar ki, neft ÜDM-in həcmi yanvarda 2 029,8 mln. manata bərabər olub. Ümumi ÜDM-in 2010-cu ilin yanvar ayı ilə müqayisədə artım tempi 0,8%, qeyri-neft ÜDM üzrə bu göstərici 6,6% göstərilib. Lakin neft ÜDM-i barədə yenə də məlumat yoxdur. Neft və qeyri-neft ÜDM-in ümumi ÜDM-də nisbəti nəzərə alınmaqla aparılan hesablamalar (həcm və nisbəti nəzərə alan ortalama hesablama) neft ÜDM-in təxminən 3,5% səviyyəsində azaldığını göstərir.

Bunu neft və qaz istehsalı sahəsinin göstəriciləri də təsdiq edir. Belə ki, yanvar ayında illik müqayisədə neft hasilatı 3,8%, qaz hasilatı isə 10,7% azalıb. Eyni zamanda qeyd etmək lazımdır ki, 2011-ci ilin yanvarında dünya bazarında neftin qiyməti ötən ilin müvafiq dövrü ilə müqayisədə orta hesabla 19,2% artıb.