Maliyyə

Ana səhifə

Maliyyə

«Bank Respublika» ötən il müştəri bazasını 55% genişləndirib

23 fevral 2011 12:36 (UTC +04:00)

Bakı. Elnur Hüseynquluyev – APA-Economics. Azərbaycanın «Bank Respublika» ASC-nin aktivlərinin həcmi 2011-ci il yanvar ayının 1-nə 257,387 mln. manat təşkil edib ki, bu da 2009-cu ilin sonuna olan göstəricidən 26% azdır.

Bankın baş ofisindən «APA-Economics»ə verilən məlumata görə, hesabat dövründə bankın kredit portfeli 20% azalaraq 157,855 mln. manat, o cümlədən istehlak kreditlərinin həcmi 41% azalaraq 41,259 mln. manat, 12 ayadək verilmiş kreditlər 40% azalaraq 40,455 mln. manat, 12 aydan artıq müddətə verilmiş kreditlər 24% azalaraq 117,300 mln. manat, Azərbaycan İpoteka Fondunun xətti ilə verilən kreditlər 8,9% artaraq 10, 998 mln. manat, bankın öz ipoteka proqramı vasitəsi ilə verdiyi kreditlər isə 25% azalaraq 6,727 mln. manat təşkil edib.

Bu dövr ərzində bankın depozit portfeli 35% azalaraq 115,387 mln. manata, o cümlədən əhalidən cəlb edilən əmanətlərin həcmi 33% azalaraq 63,268 mln. manat, müddətli depozitlər 47% azalaraq 68,338 mln. manat, tələb olunanadək depozitlər 24% artaraq 47,048 mln. manata çatıb.

Həmçinin, bankın məcmu kapitalı 13% azalaraq 48,295 mln. manat, o cümlədən nizamnamə kapitalı 23% artaraq 37,459 mln. manat olub.

Qeyd edək ki, ötən il bankın ümumi gəlirləri 32,3% azalaraq 37,184 mln. manat, xərcləri isə 16% azalaraq 39,394 mln. manat təşkil edib. Nəticədə, 2010-cu ili bank 2,210 mln. manat zərərlə başa vurub. Əvvəlki ilin (2009) nəticələsində isə bank 8,003 mln. manat mənfəət əldə edib.

Bundan başqa, bu dövr ərzində bankın cəmi müştərilərinin sayı 55% artıraraq 126 022-yə, aktiv plastik kartların sayı 54% artaraq 42 869-a, həmçinin işçilərin sayı 3,9% artaraq 494-ə çatıb.

Xatırladaq ki, «Bank Respublika» 1992-ci ildən fəaliyyət göstərir. Bankın nizamnamə kapitalında «25%+1 səhm» paketi Almaniyanın DEG İnvestisiya Şirkəti və «Sparkassen International Development Trust» şirkətinə məxsusdur. Cari ilin yanvarın 1-nə bankın 27 filialı, 44 bankomatı və 260 POS-terminalı olub.