Maliyyə

Ana səhifə

Maliyyə

«Paşa Bank» İsveçrədə nümayəndəlik açacaq

24 fevral 2011 14:35 (UTC +04:00)

Bakı. Elnur Hüseynquluyev – APA-Economics. Azərbaycanın «Paşa Bank» ASC yaxın perspektivdə İsveçrədə nümayəndəlik açmaq niyyətindədir. «APA-Economics»in məlumatına görə, bunu bankın İdarə Heyətinin sədri Fərid Axundov bildirib.

F.Axundovun sözlərinə görə, bankın planlarında İsveçrədə nümayəndəliyin açılması, xarici banklarda müxbir hesablarının açılması, həmçinin ümumilikdə beynəlxalq əməkdaşlığın genişləndirilməsi nəzərdə tutulub.

«Bankın İsveçrədə nümayəndəliyinin açılması ilə bağlı konkret vaxt söyləyə bilmərəm. Hazırda bu istiqamətdə iş aparılır, hüquqi və digər cəhətlər üzrə bu ölkənin bazarı araşdırılır. İşin qurulması üçün xarici ekspertin məsləhət xidmətlərindən istifadə olunur», - deyə F.Axundov qeyd edib.

Qeyd edək ki, hazırda bankın Bakıda iki şöbəsi fəaliyyət göstərir.

Xatırladaq ki, «Paşa Holding» Şirkətlər Qrupuna daxil olan «Paşa Bank» 2007-ci ilin noyabr ayından fəaliyyət göstərir. Cari ilin yanvar ayının 1-nə bankın aktivləri 509,074 mln. manat, depozit portfeli 388,601 mln. manat, kredit portfeli 194,860 mln. manat, məcmu kapitalı 132,284 mln. manat, o cümlədən nizamnamə kapitalı 115,4 mln. manat təşkil edib. Hazırda bankın 6 bankomatı və 56 POS-terminalı mövcuddur.