Maliyyə

Ana səhifə

Maliyyə

Bakıda «Milli Mühasibat Uçotu sistemində islahatlar: ilkin nəticələr» mövzusunda konfrans keçirilib

25 fevral 2011 10:41 (UTC +04:00)

Bakı. Nicat Mustafayev – APA-Economics. Mühasibat uçotu və audit sahəsində Azərbaycanda aparılan islahatların, o cümlədən Korporativ və Büdcə Sektorunda Hesabatlılıq Layihəsi (CAPSAP) üzrə nəticələrin müzakirə edilməsi məqsədilə bu gün Bakıda Azərbaycan Maliyyə Nazirliyinin təşkilatçılığı «Milli Mühasibat Uçotu sistemində islahatlar: ilkin nəticələr» mövzusunda konfrans keçirilib.

«APA-Economics»in məlumatına görə, tədbirdə çıxış edən Azərbaycanın maliyyə naziri Samir Şərifov ölkədə bu sahədə aparılan islahatlardan ətraflı məlumat verib və qeyd edib ki, 3 mərhələdə aparılan islahatlar hazırda da davam edir: «İslahatların ilk mərhələsinə maliyyə hesabatlarının beynəlxalq standartlar əsasında hazırlanması və təqdim olunması üzrə mühasibat uçotu subyektlərinin fəaliyyətini tənizmləyən qanunvericilik aktlarının qəbul edilməsi, ikinci mərhələyə mühasibat uçotu subyektləri tərəfindən yeni maliyyə hesabatlarının Azərbaycan qanunvericiliyi ilə müəyyən olunmuş müddətlərdə təqdim olunması üzrə müvafiq normativ-hüquqi aktlarda əks etdirilmiş kompleks tədbirlərin hazırlanması və icrası, üçüncü mərhələyə isə mühasibat uçotu subyektləri tərəfindən yeni maliyyə hesabatlarının hazırlanması üzrə əsaslı və zəruri biliklərin əldə edilməsi məqsədilə fasiləsiz tədris prosesinin təşkili daxildir».

Nazir onu da bildirib ki, hazırda Azərbaycanda 115 dövlət qurumunun 87-si, kiçik sahibkarlıq subyektləri istisna olmaqla 5 547 təşkilatın 1 816-sı, 4 500 büdcə təşkilatı, 1 717 bələdiyyə, 595 qefri-hökumət təşkilatı maliyyə hesabatlarını beynəlxalq standartlara uyğun təqdim edir.

Milli Mühasibat Uçotu sistemində islahatların ilkin nəticələrinə gəldikdə isə, S.Şərifov bildirib ki, mühasibat uçotu subyektlərinin maliyyə hesabatlarının beynəlxalq standartlar əsasında hazırlanması və təqdim olunması üçün lazımi normativ-hüquqi və metodoloji baza yaradılıb, bu subyektlər tərəfindən müvafiq standartlar əsasında hazırlanmış maliyyə hesabatlarının tərtib və təqdim edilməsi prosesi təşkil olunub, həmçinin milli və beyənlxalq standartların tədrisi üzrə müvafiq təlim-tədris sistemi yaradılıb.

İslahatların ilkin nəticələrindən irəli gələn qısamüddətli vəzifələrə gəldikdə isə, nazir qeyd edib ki, beynəlxalq və milli standartlar əsasında mühasibat uçotunun aparılmasına dair yaradılmış normativ-hüquqi bazanın təkimlləşdirilməsi zəruridir: «Eyni zamanda, mühasibat uçotu üzrə beynəlxalq və milli standartlar əsasında hazırlanan maliyyə hesabatlarının qəbul olunması prosesinin avtomatlaşdırılması və hesabatlar üzrə vahid məlumat bazasının yaradılması, həmçinin islahatların «təhsil» komponentinin daha da güclənldirilməsi vacibdir».

S.Şərifov onu da vurğulayıb ki, mühasibat uçotu üzrə beynəlxalq standartlara keçidlə əlaqədar görüləcək irihəcmli işlərin əhəmiyyətliliyini, təxirəsalınmazlığını nəzərə alaraq, sözügedən tədbirlərin icrası Azərbaycan hökuməti və bir sıra beyənlxalq maliyyə qurumları tərəfindən ölkənin müəyyən etdiyi uçot siyasətinin strategiyasına uyğun olaraq müvafiq texniki yardımların ayrılması ilə həyata keçiriləcək.
Tədbirdə çıxış edən Azərbaycanın təhsil naziri Misir Mərdanov öz növbəsində qeyd edib ki, bu sahədə peşəkarların sayını artırmaq üçün müvafiq treninqlər keçirilməli və sertifikatlaşdırılmış təlimçilər hazırlanmalıdır: «Bu istiqamətdə Təhsil Nazirliyi lazımi yardım göstərəcək».

Tədbirdə çıxış edən Dünya Bankının Azərbaycan üzrə meneceri Cozef Ouen Dünya Bankının bu prosesi dəstəklədiyini bildirib və qeyd edib ki, ölkədə müasir mühasibat uçotu sisteminin yaradılması və tətbiqi zəruri məsələlərdəndir.

Toplantıda həmçinin Dünya Banknın Azərbaycanda həyata keçirdiyi CAPSAP layihəsinin icrası haqqında məlumat verilib.

Qeyd edək ki, daha sonra konfransda milli mühasibat uçotu sisteminin təkmilləşdirilməsi, mühasibat və maliyyə uçotu sahəsində görüləcək işlər, korporativ və büdcə sektorları üzrə maliyyə hesabatlarında şəffaflığın və hesabatların peşəkar səviyyəsinin artırılması, mühasibat və audit sahəsində maarifləndirmə işinin təşkili ilə bağlı müzakirələr aparılıb.

Konfransda müxtəlif dövlət orqanlarının, içtimai əhəmiyyətli qurumların, bank və sığorta təşkilatların, ali təhsil müəssisələrinin, qeyri-hökumət təşkilatlarının və beynəlxalq maliyyə institutlarının nümayəndələri iştirak ediblər.