Maliyyə

Ana səhifə

Maliyyə

«Bank Standard» plastik kartlarla bağlı iki yeni kampaniya keçirir

01 mart 2011 08:19 (UTC +04:00)

Bakı. Elnur Hüseynquluyev – APA-Economics. Azərbaycanın «Bank Standard» QSC bu gündən etibarən plastik kartlar üzrə iki yeni kampaniyaya başlayıb.

Bankın baş ofisindən «APA-Economics»ə verilən məlumata görə, kampaniyalardan biri «Kartla ödə, «iPhone 4» qazan!» adını daşıyır və «Bank Standard» tərəfindən buraxılmış bütün plastik kartların sahiblərini əhatə edir. Lotereya kimi nəzərdə tutulan həmin kampaniyanın uduş fondu 10 ədəd «iPhone 4G» mobil telefonundan ibarətdir.

Martın 31-dək davam edəcək kampaniyada iştirak etmək istəyən müştərilər «Bank Standard» kartları ilə POS-terminal, bankomat (ATM), habelə «Mobile Banking» xidməti vasitəsilə və ya İnternetdə ödəniş apararaq lotereyada iştirak şansı qazanırlar. Belə ki, ödənilmiş məbləğin hər 50 şərti vahidi (manat, dollar, funt və avro) müqabilində kart sahibi bir şans əldə edir. Lotereya tirajı iyunun 10-da keçiriləcək.

8 Mart Beynəlxalq qadınlar gününə həsr olunmuş digər kampaniya çərçivəsində «Bank Standard» xanım müştərilərə müxtəlif plastik kartları martın 8-dək böyük endirimlə təqdim edəcək. Belə ki, martın 1-8-də xanımlar «Maestro», «MasterCard Standard», «Web card», «GiftCard», habelə «Visa Electron», «Visa Classic» və «Visa Classic Individual» kartlarından istənilən birini cəmi 8 manata əldə edə biləcək. Bir il müddətinə rəsmiləşdirilən bu kartlar sifarişçinin istəyindən asılı olaraq sahibinə xüsusi poçt xidməti ilə bayram günündə də çatdırıla bilər.

Xatırladaq ki, «AB Standard» Şirkətlər Qrupuna daxil olan «Bank Standard» 1995-ci ildən fəaliyyət göstərir. Bankın ölkə üzrə 16 filialı, 67 bankomatı, 420 POS-terminalı və 437 işçisi var.