Maliyyə

Ana səhifə

Maliyyə

Araşdırma: Azərbaycan dövlət büdcəsinə daxilolmaların artması vergi potensialının yüksəlməsi ilə bağlıdır

21 iyun 2011 13:40 (UTC +04:00)

Bakı. Nicat Mustafayev – APA-Economics. Azərbaycanın 2011-ci il dövlət büdcəsinə daxilolmaların həcminin ÜDM-ə nisbətinin təsdiq edilmiş göstərici ilə müqayisədə 4,7%, faktiki icra göstəricisinə nisbətən isə 7,3% çox olması ölkədə vergi potensialının artmasından xəbər verir. «APA-Economics»in məlumatına görə, bu barədə Azərbaycan Prezidenti yanında Strateji Araşdırmalar Mərkəzinin iqtisadiyyatın təhlili və qloballaşma məsələləri üzrə ekspert qrupu tərəfindən hazırlanan «2011-ci ilin dövlət büdcəsinə edilən dəyişikliklərin makroiqtisadi sabitlik, iqtisadi inkişaf və sosial rifaha təsirləri» mövzusuna dair təhlildə bildirilir.

Təhlilə əsasən, büdcə gəlirlərinin həcminin proqnozlaşdırılan ÜDM-ə nisbəti 34,7%-ə bərabər olacaq. Büdcə gəlirlərinin artımının 770 mln. manatı vergi və gömrük daxilolmaları (o cümlədən, Vergilər Nazirliyi xətti ilə 740 mln. manat, Dövlət Gömrük Komitəsi xətti ilə 20 mln. manat), 2 723,2 mln. manatı isə Dövlət Neft Fondunun transferti hesabına təmin ediləcək: «Konkret olaraq maddələr üzrə təhlil apardıqda – fiziki şəxslərin gəlir vergisi üzrə ötən ilin faktiki icra göstəricisi ilə müqayisədə 20%, hüquqi şəxslərin mənfəət vergisi üzrə ötən ilin faktiki icra göstəricisi ilə müqayisədə 21% artım, ƏDV üzrə ötən ilin faktiki icra göstəricisi ilə müqayisədə 6,4% artım nəzərdə tutulur. Hər üç gəlir komponenti üzrə artım ölkə iqtisadiyyatının maliyyə potensialı, həmçinin əhalinin gəlirləri və müvafiq olaraq həyat səviyyəsinin yüksəlməsindən xəbər verir. Büdcəyə edilən dəyişikliklərin digər mühüm məqamı qeyri-neft sektoru üzrə artımın 110 mln. manat və ya 2011-ci ilin ilkin büdcə göstəricisi ilə müqayisədə 4% artımla proqnozlaşdırılmasıdır. Bunun nəticəsində qeyri-neft sektorundan büdcəyə daxilolmaların həcmi ilkin 2,740 mlrd. manatdan 2,850 mlrd. manata qədər artacaq».

Xərclərə gəldikdə isə, dövlət büdcəsi xərclərinin proqnozlaşdırılan ÜDM-ə nisbəti 35,4% (icmal büdcə üzrə 41,6%) təşkil edəcəyi proqnozlaşdırılır. Bu göstərici təsdiq olunmuş rəqəmlə müqayisədə 3,7%, ötən ilin faktiki icrası ilə müqayisədə 7,1% artacaq».

Qeyd edək ki, cari ilin mayın 27-də ölkə parlamenti tərəfindən qəbul olunan 2011-ci il dövlət büdcəsinə dəyişiklərə əsasən, gəlirlər 29% və ya 15 554,2 mln. manata qədər, xərclər isə 25% və ya 15 941,2 mln. manatadək artırılıb.