Maliyyə

Ana səhifə

Maliyyə

“Paşa Həyat” sığorta şirkəti yeni icbari sığorta növü üzrə ilk ödənişini edib

30 iyun 2011 13:30 (UTC +04:00)

Bakı. Elnur Hüseynquluyev - APA-Economics. Azərbaycanın «Paşa Həyat» sığorta şirkəti «İstehsalatda bədbəxt hadisələr və peşə xəstəlikləri nəticəsində peşə əmək qabiliyyətinin itirilməsi hallarından icbari sığorta» növü üzrə ilk ödənişini həyata keçirib. Bunu «APA-Economics»ə şirkətin İdarə Heyətinin sədr müavini Niyaz İsmayılov bildirib.

N.İsmayılovun sözlərinə görə, təmir-tikinti şirkətinin əməkdaşı iş zamanı cərəyan vurması nəticəsində dünyasını dəyişməsi nəticəsində «Paşa Həyat» sığorta şirkəti tərəfindən həmin şəxsin ailəsinə (benefisiar) 11 287 manat həcmində sığorta ödənişi edilib.

Qeyd edək ki, «Paşa Həyat Sığorta» sığorta şirkəti 2010-cu ilin noyabr ayının 24-də dövlət qeydiyyatına alınıb, sığorta fəaliyyətinə lisenziya (5 illik) isə bu ilin fevral ayının 14-də verilib və həmin gündən şirkət rəsmən fəaliyyətə başlayıb. Cari ilin iyun ayının 1-nə şirkətin nizamnamə kapitalı 7 mln. manat təşkil edir. Bu ilin yanvar-may aylarında şirkətin topladığı sığorta haqlarının həcmi 6,350 mln. manat, o cümlədən «İstehsalatda bədbəxt hadisələr və peşə xəstəlikləri nəticəsində peşə əmək qabiliyyətinin itirilməsi hallarından icbari sığorta» növü 6,121 mln. manat olub. Şirkət 300-dən çox müəssisə və təşkilatın 150 mindən çox işçisini sığortalayıb.