Maliyyə

Ana səhifə

Maliyyə

«Paşa Həyat» sığorta şirkəti iki yeni sığorta növünün tətbiqinə başlayır

01 iyul 2011 08:44 (UTC +04:00)

Bakı. Elnur Hüseynquluyev - APA-Economics. Azərbaycanın «Paşa Həyat» sığorta şirkəti bu ilin sentyabr ayından «Annuitet sığortası» növünün tətbiqinə başlayacaq. Bunu «APA-Economics»ə şirkətin İdarə Heyətinin sədr müavini Niyaz İsmayılov bildirib.

Onun sözlərinə görə, bu sığorta növündə müştərilər şirkətlə müvafiq sığorta müqaviləsi bağlayaraq müəyyən yaş həddinədək (müddət müştərinin seçimindən asılıdır) öz gəlirlərinin müəyyən bir hissəsini sığorta şirkətinə əmanət şəklində ödəyir: «Müştəridən cəlb olunan vəsaitlər isə müvafiq banklara investisiya olunur. Nəticədə müqavilə bitdikdən sonra toplanan vəsaitlərin üzərinə müəyyən faiz gəlirləri də hesablanmaqla müştərinin seçimindən asılı olaraq vəsait birdəfəlik və ya annuitet olaraq müştəriyə ödənilir. Müqavilədə minimum yaş həddi 18, müqavilənin minimum müddəti isə 3 il qeyd olunur. Bu bir növ pensiya sığortası kimidir».

N.İsmayılov qeyd edib ki, gələn həftədən başlayaraq şirkət daha bir yeni sığorta növünün - «Həyatın yaşam sığortası» növünün tətbiqinə başlayacaq. Bu sığorta növündə sığorta müqavilə üzrə göstərilən tarix bitdiyi halda sığortalı üzərinə müəyyən faizlər (minimum 5% - maksimum 10%) əlavə olunmaqla sığorta məbləğini geri ala biləcək.

Qeyd edək ki, «Paşa Həyat Sığorta» sığorta şirkəti 2010-cu ilin noyabr ayının 24-də dövlət qeydiyyatına alınıb, sığorta fəaliyyətinə lisenziya (5 illik) isə bu ilin fevral ayının 14-də verilib və həmin gündən şirkət rəsmən fəaliyyətə başlayıb. Cari ilin iyul ayının 1-nə şirkətin nizamnamə kapitalı 7 mln. manat təşkil edir.