Maliyyə

Ana səhifə

Maliyyə

Vergi Apellyasiya Şurası «Azərbaycan Kredit Bankı»nın şikayətini təmin etməyib

02 iyul 2011 11:15 (UTC +04:00)

Bakı. Elnur Hüseynquluyev – APA-Economics. Azərbaycan Vergilər Nazirliyi yanında Vergi Apellyasiya Şurası «Azərbaycan Kredit Bankı» ASС-nin mənfəətin nizamnamə kapitalının artırılmasına yönəldilmiş hissəsindən dividend kimi ödəmə mənbəyində vergi tutulması barədə şikayətinə baxılıb.
Nazirlikdən «APA-Economics»ə verilən məlumata görə, müəyyən edilib ki, bankın 2009-cu ilin yekununa görə əldə edilmiş və nizamnamə kapitalının artırılmasına yönəldilmiş mənfəətindən ödəmə mənbəyində 122,458 min manat məbləğində vergi tutularaq, onun bank hesabından silinib.
«Banklar və digər kredit təşkilatları tərəfindən əhalinin əmanətləri üzrə ödənilən faiz məbləğlərindən, habelə investisiya qiymətli kağızları üzrə dividend və faizlərdən gəlir vergisinin tutulması üzrə güzəştlərin müəyyən edilməsi haqqında» qanununa əsasən, banklar və digər kredit təşkilatları tərəfindən əhalinin əmanətləri üzrə ödənilən faiz məbləğlərindən, habelə investisiya qiymətli kağızları üzrə dividendlərdən və faizlərdən gəlir vergisi tutulmur. Lakin həmin qanun 2010-cu il yanvarın 1-dək qüvvədə olduğundan və cəmiyyətin xalis mənfəətinin bir hissəsi müəssisənin nizamnamə kapitalının və səhmlərin nominal dəyərinin artırılmasına 2010-cu ildə yönəldildiyindən mənfəətin nizamnamə kapitalının artırılmasına yönəldilən hissəsindən verginin tutulması qanunvericiliyin tələblərinə uyğundur.
Bundan başqa, bankın nizamnamə kapitalının balans mənfəəti hesabına artırılması haqqında qərar şikayətçinin müraciətində göstərildiyi kimi 2009-cu ilin aprelin 3-də deyil, səhmdarların 2010-cu il mart ayının 18-də növbədənkənar ümumi yığıncağında qəbul edilmiş, cəmiyyətin səhmlərinin emissiyası 2010-cu aprelin 27-də Azərbaycan Qiymətli Kağızlar üzrə Dövlət Komitəsində dövlət qeydiyyatına alınıb. Beləliklə sübuta yetirilib ki, bankın xalis mənfəətinin bir hissəsinin müəssisənin nizamnamə kapitalının artırılmasına yönəldilməsi və səhmdarların səhmlərinin nominal dəyərinin artırılması 2010-cu ildə həyata keçirilib, nəticədə Vergi Məcəlləsinin 77.1-ci maddəsinə əsasən vergi öhdəliyi 2010-cu ildə yaranıb. Vergi Məcəlləsinin 122.1-ci maddəsinə əsasən ödəmə mənbəyində vergi ödənildiyi anda tutulur.
Qeyd olunanları nəzərə alaraq, Vergi Apellyasiya Şurası «Azərbaycan Kredit Bankı» ASC-nin şikayətini təmin etməyib.