Maliyyə

Maliyyə

Milli Depozit Mərkəzinin səhmdarlarının növbədənkənar ümumi yığıncağı keçirilib

12 avqust 2011 14:50 (UTC +04:00)

MDM-dən «APA-Economics»ə verilən məlumata görə, iclas zamanı MDM-in əməliyyat və maliyyə nəticələri nəzərdən keçirilib, altı ay ərzində başa çatmış layihələr qiymətləndirilib. Tədbirdə mərkəzdə daxili prosedurlaşma qaydaları üzrə işlərin davam etdiyi və həyata keçirilən əməliyyatların standartlaşması prosesinin işlənildiyi də qeyd edilib.

Tədbirdə bildirilib ki, hesabat dövründə həmçinin, əməliyyat sahəsində də irəliləyişlər olub, depozitar və reyestrsaxlayıcı fəaliyyəti üzrə əməliyyatların avtomatlaşdırılması prosesi intensivləşdirilib və gələcəkdə tətbiq edilə biləcək yeni elektron xidmət sahələrinin bünövrəsi qoyulub. Bakı Fond Birjası ilə MDM arasında fasiləsiz əqdlərin bağlanmasını təmin edən elektron link istismara verilib və uçot sisteminə qiymətli kağızlar bazarının peşəkar iştirakçılarına və iri investorlara məsafədən elektron interfeys vasitəsilə giriş imkanları yaradılıb. Bu yeniliklərlə yanaşı, uçot sistemində hesabatlılıq prinsipləri təkmilləşdirilib, MDM-in informasiya texnologiyaları üzrə mütəxəssisləri tərəfindən proqram təminatında bazarın peşəkar iştirakçıları üçün yeni interfeyslər işlənilib.

Yığıncaqda bildirilib ki, MDM fond bazarının yeni arxitekturasının işlənilməsi layihələrində də yaxından iştirak edir və Qiymətli Kağızlar üzrə Dövlət Komitəsi (QKDK) tərəfindən hazırlanmış Qiymətli kağızlar bazarının inkişafına dair Dövlət Proqramına və «Qiymətli kağızlar haqqında» yeni qanun layihəsinə müvafiq olaraq bazarda mərkəzi «post-trade» təşkilatı kimi özünün yeni inkişaf istiqamətlərini müəyyən edib.

Tədbirdə qeyd olunub ki, hesabat dövründə MDM tərəfindən saxlanmaya cəlb edilən aktivlərin həcminin artaraq 4,4 mlrd. manat məbləğinə çatdırılıb. O cümlədən, 19 yeni emitentlə müqavilə bağlanıb, 393 mln. manat həcmində 132 yeni emissiya qeydiyyata alınıb.

İclasda iştirak edən QKDK-nın sədri Rüfət Aslanlı MDM-in elektronlaşma istiqamətini prioritet elan edərək, xidmətlərin operativliyinin artırılması və sadələşdirilməsi üzrə işin sürətləndirilməsi, maliyyə davamlılığını nəzərdə saxlamaqla təşkilatın institutlaşması istiqamətində insan resurslarına və müasir aparat həllərə diqqətin gücləndirilməsi kimi gələcək fəaliyyət üzrə tapşırıq və tövsiyələrini bildirib.