Maliyyə

Maliyyə

İlin əvvəlindən Azərbaycanda problemli kreditlərin həcmi 13% artıb

18 avqust 2011 10:57 (UTC +04:00)

Bakı. Əli Əhmədov – APA-Economics. Bu ilin iyun ayında Azərbaycan iqtisadiyyatına yatırılan kredit qoyuluşlarının ümumi həcmi 205,5 mln. manat artaraq iyulun 1-nə 8 955,9 mln. manat təşkil edib. Məcmu kredit portfelinin həcmi ilin əvvəlinə nisbətən 2,1% azalsa da, son bir ildə bu göstərici 1,3% artıb.

Azərbaycan Mərkəzi Bankı tərəfindən «APA-Economics»ə verilən məlumata görə, kredit portfelinin böyük hissəsi (2 945,8 mln. manat və ya 32,9%) istehlak kreditlərinin payına düşür. Bunun 432 mln. manatını və ya ümumi kredit portfelinin 4,8%-ni ipoteka kreditləri təşkil edir. Ticarət və xidmət sektoruna verilən kreditlər 2 447,1 mln. manat (27,3%), inşaat və əmlak sektoruna - 697 mln. manat (7,8%), sənaye və istehsala - 531 mln. manat (5,9%), akkreditivlər - 469 mln. manat (5,2%), nəqliyyat və rabitə sektoryna - 464,3 mln. manat (5,2%), kənd təsərrüfatı və emal sahəsinə - 434,6 mln. manat (4,9%), energetika, kimya və təbii ehtiyatlar sektoruna verilən kreditlərin həcmi isə 304,5 mln. manat (3,4%) təşkil edib.

Hesabat ayında istehlak kreditləri 73,6 mln. manat (o cümlədən, ipoteka kreditləri 48,4 mln. manat), ticarət və xidmət sahəsinə verilən kreditlər 55,1 mln. manat, energetika və kimya sektoruna - 14,3 mln. manat, kənd təsərrüfatına - 5,7 mln. manat, inşaat və əmlaka - 25,8 mln. manat, sənaye və istehsala - 21,6 mln. manat, akkreditivlərə - 1,4 mln. manat artıb, nəqliyyat və rabitəyə verilən kreditlərin həcmi isə 0,6 mln. manat azalıb.

Ümumi kredit portfelində problemli kreditlərin payı 6,2% təşkil edir. İyun ayında kredit portfelində problemli kreditlərin payı 0,1 faiz bəndi azalsa da, məbləği 6,1 mln. manat artaraq 557,9 mln. manata çatıb. İlin əvvəlindən indiyədək problemli kreditlərin həcmi 13,2%, son bir ildə isə 36,5% artıb.