Maliyyə

Maliyyə

Azərbaycan Beynəlxalq Bankı əhalidən cəlb etdiyi əmanətlərin həcmini artırıb

24 avqust 2011 08:32 (UTC +04:00)

Bakı. Elnur Hüseynquluyev – APA-Economics. Azərbaycan Beynəlxalq Bankının (ABB) aktivlərinin həcmi 2011-ci il iyul ayının 1-nə 4 951,302 mln. manat təşkil edib ki, bu da ötən ilin müvafiq dövrünün göstərici ilə müqayisədə 6,6% azdır.

ABB-nin baş ofisindən «APA-Economics»ə verilən məlumata görə, hesabat dövründə bankın kredit portfeli 26% azalaraq 3 011,427 mln. manat, o cümlədən istehlak kreditlərinin həcmi 11,3% artaraq 400,865 mln. manat, depozit portfeli 18,8% azalaraq 2 287,789 mln. manat, o cümlədən əhalidən cəlb edilən əmanətlərin həcmi 84% artaraq 804,397 mln. manat təşkil edib.

Bankın məcmu kapitalı 21% artaraq 498,018 mln. manat, o cümlədən nizamnamə kapitalı sabit qalaraq 240 mln. manat olub.

Qeyd edək ki, son bir ildə bankın ümumi gəlirləri 6,3% azalaraq 170,829 mln. manat, xərcləri isə 34% artaraq 161,399 mln. manat təşkil edib. Nəticədə, bankın mənfəəti 70% azalaraq 9,430 mln. manata çatıb.

Bununla yanaşı, bankın cəmi aktiv plastik kartlarının sayı 5% artaraq 1 800 778 ədəd, işçilərin sayı isə sabit qalaraq 1 211 nəfər olub.

Xatırladaq ki, Azərbaycan və regionun ən iri bank kredit təşkilatı olan ABB 1992-ci ildən fəaliyyət göstərir. Bankın nizamnamə kapitalında dövlətin iştirak payı 50,2% təşkil edir. Səhmlərin qalan 40%-i xüsusi mülkiyyətdədir, 10%-i isə bankın əmək kollektivinə məxsusdur. Cari ilin iyulun 1-nə bankın 37 filialı, 618 bankomatı, 3 613 POS- terminalı olub.