Maliyyə

Maliyyə

«Paşa Bank»ın xalis mənfəəti son bir ildə kəskin azalıb

24 avqust 2011 10:59 (UTC +04:00)

Bakı. Elnur Hüseynquluyev – APA-Economics. Azərbaycanın «Paşa Bank» ASC-nin xalis mənfəəti 2011-ci ilin yanvar-iyun aylarında 5,072 mln. manat təşkil edib ki, bu da ötən ilin analoji dövrünün göstəricisi ilə müqayisədə 41% azdır. «APA-Econmics»in məlumatına görə, bunu bu gün keçirilən mətbuat konfransında bankın İdarə Heyətinin üzvü Şahin Məmmədov bildirib.

Ş.Məmmədovun sözlərinə görə, son bir il ərzində xalis mənfəətin azalması müştərilərə verilmiş kreditlərin orta faiz dərəcəsinin azalması, həmçinin müddətli depozitlərin sayının artması nəticəsində faiz xərclərinin artması və kredit portfeli üzrə ehtiyat fonduna ayırmaların artırılması olub.

Ş.Məmmədov bildirib ki, bu müddət ərzində bankın faiz mənfəəti təxminən 10% azalaraq 10,849 mln. manat olub. Bu müddət ərzində bankın faiz gəliri 8,4% artaraq 17,399 mln. manat, haqq və komissiya gəlirləri 33,5% artaraq 1,291 mln. manat, əməliyyat gəlirləri isə 18,3% azalaraq 12,360 mln. manat təşkil edib.

Ş.Məmmədov həmçinin təhlil olunan dövrdə bankın ümumi xərclərinin 11,559 mln. manata, o cümlədən faiz xərclərinin 6,550 mln. manata, komissiya xərclərinin 495 min manata, inzibati xərclərin isə 4,564 mln. manata çatdığını qeyd edib.

Xatırladaq ki, «Paşa Holding» Şirkətlər Qrupuna daxil olan «Paşa Bank» ASC 2007-ci ilin noyabr ayından fəaliyyət göstərir.