Maliyyə

Maliyyə

«Əmrah Sığorta» şirkətinin daxilolmaları kəskin azalır

26 avqust 2011 09:16 (UTC +04:00)

Bakı. Elnur Hüseynquluyev – APA- Economics. Azərbaycanın «Əmrah Sığorta» şirkətinin 2011-ci ilin yanvar-iyul aylarında daxilolmalarının həcmi 331,567 mln. manat təşkil edib ki, bu da ötən ilin analoji dövrünün göstəricisi ilə müqayisədə 47,8% azdır.

Şirkətin baş ofisindən «APA-Economics»ə verilən məlumata görə, daxilolmaların strukturunda ən çox sığorta haqqı «Avtonəqliyyat vasitələrinin sığortası» (181,567 min manat), «Əmlakın yanğından və digər risklərdən sığortası» (91,601 min manat) və «Fərdi qəza və xəstəliklər sığortası» (42,171 min manat) növləri üzrə toplanılıb. Bu növlərin məcmu sığorta haqlarındakı payı müvafiq olaraq 55%, 28% və 12,7% təşkil edib.

Sığorta ödənişlərinə gəldikdə isə hesabat dövründə şirkətin məcmu ödənişləri 21,5% azalaraq 156,970 min manata çatıb. Belə ki, qeyd olunan dövrdə ən çox vəsait «Avtonəqliyyat vasitələrinin sığortası» (147,545 min manat və ya 94%) və «Əmlakın yanğından və digər risklərdən sığortası» (8,850 min manat və ya 5,6%) növləri üzrə ödənilib.

Bu müddət ərzində şirkətin könüllü sığorta növləri üzrə topladığı sığorta haqlarının həcmi 315,340 min manat, o cümlədən əmlak sığortası növləri üzrə 273,168 min manat, icbari sığorta növləri üzrə isə 16,228 min manat təşkil edib.

Qeyd edək ki, ötən ilin birinci rübündən başlayaraq şirkətin sığorta haqları üzrə azalma tendensiyası müşahidə olunur. Belə ki, ötən ilin yanvar-mart aylarında şirkətin sığorta haqlarının həcmi 150 min manat olmuşdursa, 2011-ci ilin I rübündə bu göstərici 18% azalaraq 123 min manat təşkil edib. Həmçinin, 2011-ci ilin yanvar-iyun aylarında 2010-cu ilin ilk yarısına nisbətən azalma müşahidə olunub. Belə ki, həmin dövrdə sığorta haqlarının həcmi 28% azalaraq 288 min manat təşkil edib.

Şirkətdən bildirib ki, sığorta haqlarının azalmasına səbəb «Əmrah Sığorta»da «Avtonəqliyyat vasitələrinin sığortası» növü üzrə yığımların kəskin azalmasıdır. «Bunu isə «AmrahBank» ASC-də avtomobil kreditlərinin sayının azalması ilə izah etmək olar. Yəni ötən ilin yanvarından başlayaraq bankın avtomobil kreditlərinin sayı azalıb».

Xatırladaq ki, təsisçisi 2 yerli fiziki şəxs olan «Əmrah Sığorta» şirkəti 1993-cü ildən fəaliyyət göstərir.