Maliyyə

Ana səhifə

Maliyyə

«Çartis Azərbaycan» şirkəti son bir ildə sığorta ödənişlərini kəskin azaldıb

08 sentyabr 2011 13:04 (UTC +04:00)

Bakı. Elnur Hüseynquluyev – APA-Economics. «Çartis Azərbaycan» (əvvəlki «AIG Caspian») sığorta şirkətinin 2011-ci ilin yanvar-avqust aylarında topladığı sığorta haqlarının həcmi 1,183 mln. manat təşkil edib ki, bu da ötən ilin analoji dövrünün göstəricisi ilə müqayisədə 12% azdır.

Şirkətin Maliyyə Departamentinin direktoru Elmar İslamın «APA-Economics»ə verdiyi məlumata görə, hesabat dövründə şirkətin sığorta riskləri üzrə ödənişləri 4 dəfə azalaraq 9,967 min manata çatıb.

E.İslamın sözlərinə görə, bu müddət ərzində ən çox sığorta haqqı «Ümumi mülki məsuliyyətin sığortası» (588,353 min manat), «Əmlakın yanğından və digər risklərdən sığortası» (404 min manat) və «Yanğından icbari sığorta» (103,853 min manat) növləri üzrə toplanıb. Bu növlərin ümumi daxilolmalarda xüsusi çəkisi müvafiq olaraq 48%, 34% və 8,8% təşkil edib.

Ödənişlərə gəldikdə isə, ən çox vəsait «İşçilərin dələduzluğu sığortası» (6,617 min manat və ya 66%) və «Yüklərin (nəqliyyat) sığortası» (2,511 min manat və ya 25%) növləri üzrə ödənilib.

Xatırladaq ki, «Çartis Azərbaycan» ASC 1999-cu ildən «AIG Caspian» sığorta şirkəti adı ilə fəaliyyət göstərib, 2010-ci ilin noyabr ayında şirkətin adı «Çartis Azərbaycan»a dəyişib. Əvvəllər şirkətin təsisçiləri «Caravan Investment» şirkəti (51%) və «AIG Inc.» şirkəti (49%) olub. Səhmdarların tərkibində edilən dəyişikliyə əsasən, «Caravan Investment» şirkəti öz payını (51%) ABŞ-ın «AIG Inc.» şirkətinə satıb və bununla da xarici şirkət «Çartis Azərbaycan»ın səhmlərinin 100%-nə sahib olub.

Cari il sentyabrın 1-nə şirkətin nizamnamə kapitalı 3,5 mln. manat təşkil edib.