Maliyyə

Ana səhifə

Maliyyə

«PAŞA Həyat Sığorta» şirkəti sığortalanmış müştəriləri üçün treninqlərə başlayıb

13 sentyabr 2011 10:22 (UTC +04:00)

Bakı. Elnur Hüseynquluyev – APA-Economics. Azərbaycanın «PAŞA Həyat Sığorta» şirkəti ilk dəfə olaraq «İstehsalatda bədbəxt hadisələr və peşə xəstəlikləri nəticəsində peşə əmək qabiliyyətinin itirilməsi hallarından icbari sığorta» növü üzrə sığortalanmış şirkətlərin işçiləri üçün treninqə başlayıb.

«APA-Economics»in məlumatına görə, açılış mərasimində çıxış edən «PAŞA Həyat Sığorta» şirkəti İdarə Heyətinin sədr müavini Niyaz İsmayılov bildirib ki, «İstehsalatda bədbəxt hadisələr və peşə xəstəlikləri nəticəsində peşə əmək qabiliyyətinin itirilməsi hallarından icbari sığorta haqqında» qanuna əsasən, ölkədə hər bir işəgötürən öz işçisini bu sığorta növü üzrə sığortalamağa borcludur: «Həyatda avtomobil, daşınmaz əmlak və digər sığorta olunmuş hər hansı bir predmetin ödənişini etmək və ya onu yenisi ilə əvəz etmək mümkündür. Lakin insan ömrünü, insan həyatını qaytarmaq və ya nə ilə isə əvəz etmək mümkün deyil. Məhz bu səbəbdən də Azərbaycanda belə bir qanunun qəbul edilməsinə zərurət yaranıb».

N.İsmayılovun sözlərinə görə, bu sığorta növündə qanunda nəzərdə tutulmuş normativ-hüquqi aktlarda istehsalatda bədbəxt hadisələr və peşə xəstəlikləri nəticəsində peşə əmək qabiliyyətinin itirilməsi hallarından icbari sığorta tariflərinin müəyyən edilməsi, istehsalatda bədbəxt hadisələr və peşə xəstəlikləri nəticəsində peşə əmək qabiliyyətinin itirilməsi hallarından icbari sığorta üzrə aylıq sığorta ödənişi məbləğinin müəyyən edilməsi məqsədləri üçün orta aylıq əmək haqqı miqdarının hesablanması, həmçinin əmək qabiliyyətinin itirilməsi hallarından icbari sığorta üzrə sığorta ödənişinin təyin edilməsi, verilməsinin dayandırılması və bərpa olunması və peşə əmək qabiliyyətinin itirilməsi hallarından icbari sığorta üzrə annuitet haqqının məbləğinin hesablanması və digər qaydalar əksini tapıb.

Daha sonra treninqə start verilib. Treninq beynəlxalq uyğunluq və qiymətləndirmə xidmətləri göstərən «Meyer» şirkətinin Türkiyə nümayəndəliyinin baş direktoru Göhkan Yücel tərəfindən aparılır. Xarici mütəxəssis tərəfindən iştirakçılara əməyin mühafizəsi və təhlükəsizliyi (ƏMT) siyasəti və qaydaları, ƏMT sisteminin əhəmiyyəti, dövlət, işəgötürən və işçinin məsuliyyəti, həmçinin təhlükəli davranışlar və vəziyyətlər mövzusunda maarifləndirici məlumatlar veriləcək.

Sentyabrın 16-dək davam edəcək treninqdə Azərbaycan Dövlət Neft Şirkəti (ARDNŞ) və «Azerenerji» ASC, habelə bu qurumların tabeçiliyində olan müəssisələr, həmçinin «Azenko», «Azfen» və «Azərsu» ASC və «PAŞA Sığorta» şirkətinin nümayəndələri iştirak edir.

Treninqin sonunda iştirakçılara tədbirin təşkilatçılarından olan «Azercert» və «Meyer» şirkətləri tərəfindən sertifikatlar təqdim olunacaq.

Xatırladaq ki, «PAŞA Həyat Sığorta» şirkəti 2010-cu il noyabr ayında dövlət qeydiyyatına alınıb, sığorta fəaliyyətinə lisenziya (5 illik) isə 2011-ci ilin fevralında verilib. Cari il sentyabr ayının 1-nə şirkətin nizamnamə kapitalı 7 mln. manat təşkil edib.