Maliyyə

Ana səhifə

Maliyyə

Dünya Bankının yeni layihə ilə bağlı Azərbaycan Qiymətli Kağızlar üzrə Dövlət Komitəsi ilə müzakirələrə başlayıb

10 oktyabr 2011 14:25 (UTC +04:00)

Bakı. Nicat Mustafayev – APA-Economics. «Kapital bazarlarının müasirləşdirilməsi Layihəsi» çərçivəsində Dünya Bankının (DB) nümayəndə heyəti Azərbaycanda səfərdədir. Qiymətli Kağızlar üzrə Dövlət Komitəsindən (QKDK) «APA-Economics»ə verilən məlumata görə, oktyabrın 14-dək davam edəcək səfərin məqsədi sözügedən layihənin icrasına başlanılması ilə əlaqədar görülən tədbirlərin müzakirəsidir.

Bununla əlaqədar, DB-nın nümayəndə heyəti QKDK-nın sədri Rüfət Aslanlı ilə görüş keçirib. Görüşdə QKDK-nın sədri «Kapital bazarlarının müasirləşdirilməsi Layihəsi»nin icrasına başlanılması ilə əlaqədar hazırlıq işlərinin intensivləşdiyini qeyd edərək, bu istiqamətdə DB və Komitə arasında səmərəli əməkdaşlığın davam etdiyini bildirib.

Öz növbəsində DB-nın nümayəndə heyətinin rəhbəri xanım Uzma Xəlil bu layihənin Azərbaycan kapital bazarlarının inkişafında mühüm rola malik olacağını vurğulayıb.

Qeyd edək ki, sözügedən layihə üçün DB tərəfindən QKDK-ya 12 mln. ABŞ dolları məbləğində kredit ayrılıb.

Xatırladaq ki, layihənin icrasına İsveçrə İqtisadi Əməkdaşlıq Katibliyi (SECO) tərəfindən daha 3 mln. dollarlıq qrant ayrılacaq. Kapital bazarının modernləşdirilməsi layihəsi 2010-cu ildə müxtəlif beynəlxalq donor təşkilatlarının maliyyələşdirdiyi və DB tərəfindən idarə edilən «FIRST Initiative» proqramı tərəfindən Azərbaycanda kapital bazarının inkişafı strategiyasının bir hissəsidir. Layihənin icrası «2011-2020-ci illərdə Azərbaycanda qiymətli kağızlar bazarının inkişafı» Dövlət Proqramında nəzərdə tutulan tədbirlərin icrasının dəstəklənməsidir.