Maliyyə

Ana səhifə

Maliyyə

«Bank Standard» bazara yeni kart məhsulları çıxarıb

13 oktyabr 2011 14:15 (UTC +04:00)

Bakı. Elnur Hüseynquluyev – APA-Economics. Azərbaycanın «Bank Standard» QSC tələbə, gənclər və müəllimlər üçün hazırlanmış yeni xüsusi kart məhsullarının çeşidini təqdim edib.

Bankın baş ofisindən «APA-Economics»ə verilən məlumata görə, yeni kart məhsulları «MasterCard Standard» bazasında «Beynəlxalq tələbə eyniləşdirmə kartı» (ISIC), «Beynəlxalq gənclər eyniləşdirmə kartı» (IYTC) və «Beynəlxalq müəllim eyniləşdirmə kartı» (ITIC) proqramları ilə birgə layihə çərçivəsində hazırlanıb.

«Bank Standard» tərəfindən buraxılan bu yeni kartlar ISIC, IYTC və ITIC beynəlxalq vəsiqələrin bütün xüsusiyyətlərini və üstünlüklərini qoruyacaq. Bu üstünlüklər arasında dünyanın 120 ölkəsində təqdim olunan on minlərlə endirim, təyyarə biletlərinə endirimlər, habelə tələbə, gənclər və müəllimlər üçün xaricdə təqdim olunan müxtəlif güzəştlər (muzey, teatr, nəqliyyat) mövcuddur. Bu kartlar əksər ölkələrdə sahibinin şəxsiyyətini təsdiq edən sənəd kimi qəbul olunur.

Eyni zamanda, «Bank Standard»ın təşəbbüsü ilə həyata keçirilmiş bu birgə layihə həmin kartların unikal xüsusiyyətlərinin siyahısına ödəmə aləti funksiyasını da əlavə edir.

Bundan başqa, «Bank Standard» bu kartlardakı olan gündəlik vəsait qalıqlarına illik 10% kimi gəlirlik də əlavə edir. Kartın alınmasından 6 ay keçdikdən sonra müştəri ötən müddət ərzində kartla apardığı əməliyyatların həcmindən asılı olaraq kredit almaq üçün də banka müraciət edə bilər.

«ISIC-Standard» və ya «ITIC-Standard» kartını almaq üçün banka şəxsiyyət vəsiqəsini və tələbə (aspirant) ya da müəllim statusunu təsdiq edən sənədi təqdim etmək kifayətdir. «IYTC-Standard» kartı isə 26 yaşı tamam olmayan şəxslərə sadəcə şəxsiyyət vəsiqəsi əsasında verilir. Bütün sadalanan kartların istehsalı üçün şəxsi fotoşəkil tələb olunur.

Qeyd edək ki, kartlar 12 ay müddətinə Azərbaycan manatı və ya ABŞ dolları valyutalarında verilir. «ITIC-Standard» kartının qiyməti 20 manat (dollar), digərləri isə 15 manat (dollar) təşkil edir.