Maliyyə

Ana səhifə

Maliyyə

«Meqa Sığorta» şirkətinin daxilolmaları 2,7 dəfə artıb

18 oktyabr 2011 11:11 (UTC +04:00)

Bakı. Elnur Hüseynquluyev - APA-Economics. Azərbaycanın «Meqa Sığorta» şirkətinin 2011-ci ilin yanvar-sentyabr aylarında topladığı sığorta haqlarının həcmi 790 min manata çatıb ki, bu da ötən ilin analoji dövrünün göstəricisi ilə müqayisədə 2,7 dəfə çoxdur.

Şirkətin baş ofisindən «APA-Economics»ə verilən məlumata görə, hesabat dövründə ən çox sığorta haqqı «Fərdi qəza və xəstəliklər sığortası» (281,758 min manat), «Avtonəqliyyat vasitələrinin sığortası» (271,605 min manat), «Əmlakın yanğından və digər risklərdən sığortası» (27,460 min manat) növləri üzrə toplanılıb.

Son bir ildə şirkətin sığorta hadisələri üzrə ödənişləri 6,1 dəfə azalaraq 36,220 min manat olub. Şirkət bu dövrdə ən çox ödənişi «Avtonəqliyyat vasitələrinin sığortası» (34,647 min manat) növü üzrə həyata keçirib.

Qeyd edək ki, könüllü sığorta növləri üzrə 785,142 min manat, icbari sığorta növləri üzrə isə 4,377 min manat sığorta haqqı toplanılıb. Ödənişlərdə isə 34,711 min manat könüllü sığorta növləri, 1,510 min manat icbari sığorta növlərinə ödənilib.

Xatırladaq ki, təsisçisi iki yerli fiziki şəxs olan «Meqa Sığorta» şirkəti 1998-ci ildən «Naxçıvan Sığorta» şirkəti kimi fəaliyyətə başlayıb. Lakin 2001-ci ildə şirkətin brendi «BE&G», 2010-cu ilin oktyabr ayından isə «Meqa Sığorta»ya dəyişdirilib. Şirkət müştərilərə 23 könüllü və 4 icbari sığorta növü üzrə xidmət göstərir.