Maliyyə

Ana səhifə

Maliyyə

«DəmirBank»ın Nərimanov filialının yeni ofisinin açılışı olub

18 oktyabr 2011 11:36 (UTC +04:00)

Bakı. Elnur Hüseynquluyev - APA-Economics. Bu gün Azərbaycanın «DəmirBank» ASC-nin Nərimanov filialının yeni ofisinin rəsmi açılışı olub.

«APA-Economics»in məlumatına görə, tədbirdə çıxış edən bankın İdarə Heyətinin sədr müavini Mərdan Şıxaliyev bildirib ki, yeni korporativ dizayn üslubunda tərtib edilən filial müştərilərə müxtəlif növ istehlak və biznes kreditləri, əmanətlər, plastik kartlar, pulköçürmələri, kommunal və digər bank xidmətləri göstərir: «Filial 2007-ci ildən fəaliyyət göstərir. Hazırda bu günə filialın 3 min fiziki şəxs, 60 hüquqi və 45 sahibkar müştərisi var. Bundan başqa, filialın kredit portfelinin həcmi 15,699 mln. manat, əhalidən cəlb edilən əmanətlərin həcmi isə 8,161 mln. manata çatıb».

M.Şıxaliyevin sözlərinə görə, son bir ildə bankın 5 filialı yeni korporativ dizaynda tərtib edilərək müştərilərin istifadəsinə verilib. Hazırda «DəmirBank» ASC-nin ölkə üzrə 31 filial və şöbəsi fəaliyyət göstərir. Növbəti ildə bankın digər filiallarının yeni korporativ dizayna uyğunlaşdırılması nəzərdə tutulur.

Qeyd edək ki, bankın Nərimanov filialı Həsənoğlu küçəsi, 13F ünvanında fəaliyyət göstərir.

Xatırladaq ki, «DəmirBank» (əvvəlki «Azərdəmiryolbank») 1989-cu ildə fəaliyyətə başlayıb. Bankın səhmdarları sırasına beynəlxalq maliyyə təşkilatları olan Avropa Yenidənqurma və İnkişaf Bankı və Hollandiya İnkişaf Maliyyə Şirkəti (FMO) daxildir.