Maliyyə

Ana səhifə

Maliyyə

«Bank of Baku» «Bolkart» adlı yeni kart məhsulunu təqdim edib

19 oktyabr 2011 10:57 (UTC +04:00)

Bakı. Elnur Hüseynquluyev - APA-Economics. Azərbaycanın «Bank of Baku» ASC yeni ödəniş sistemli «Bolkart» adlı məhsulunu təqdim edib.

Bankın baş ofisindən «APA-Economics»ə verilən məlumata görə, «Bolkart» tamamilə pulsuz, bərpa olunan limitli, üstünlükləri bol, müddəti 3 ilə qədər olan kredit kartıdır. «Bolkart»ı bankla partnyor olan tanınmış geyim, parfümeriya, kompüter, mobil telefon, məişət texnikası və mebel mağazalarında, o cümlədən restoran, supermarket və digər ticarət obyektlərində istifadə etmək mümkündür.

Qeyd edək ki, «Bolkart»ın işləmə sistemi, Türkiyədə artıq, demək olar, əksər ticarət obyektlərində uğurla tətbiq olunan taksit sisteminin analoqudur.

Kartın əsas üstünlüklərdən biri həmin kartla alınan mal və ya xidmətlərin dəyərini bölüb, aylar ərzində ödəmək imkanının olması, üstəlik, əlavə xərcsiz və komissiyasız olmasıdır. Qeyd edək ki, ödənilən vəsait kart hesabında yenidən bərpa olunur və kartın müddəti ərzində dəfələrcə istifadə oluna bilir. Belə ki, «Bank of Baku» ilə partnyor ticarət obyekti ilə razılaşmadan asılı olaraq «Bolkart»dan «Əlavə xərcsiz 1 aya ödə» yazısını gördüyünüz ticarət obyektlərində istifadə etməklə aldığınız malların və ya xidmətlərin dəyərini növbəti ayın 10-dək ödəyə bilərsiniz. Həmçinin «Əlavə xərcsiz 6 aya ödə» yazısını gördüyünüz ticarət obyektlərində «Bolkart»dan istifadə etməklə aldığınız malların və ya xidmətlərin dəyərini bölüb, 6 ay ərzində (hər ayın 10-dək) ödəyə bilərsiniz. «Əlavə xərcsiz 12 aya ödə» yazısını gördüyünüz ticarət obyektlərində «Bolkart»dan istifadə etməklə aldığınız malların və ya xidmətlərin dəyərini bölüb, 12 ay ərzində (hər ayın 10-dək) ödəyə bilərsiniz.

Qeyd edək ki, kart müştərilərə pulsuz təqdim olunur! Minimum 6 ay bankla iş tarixçəsi olan müştərilər isə aktiv kreditlərinə paralel olaraq «Bolkart»ı əldə edə bilərlər. «Bolkart»ı əldə etmək üçün şəxsiyyət vəsiqəsi və iş yerindən arayışı (bəzi partnyor təşkilatların əməkdaşlarından arayış tələb edilmir) təqdim etmək kifayətdir.