Maliyyə

Ana səhifə

Maliyyə

Britaniyalı deputatlar ölkənin Avropa İttifaqından çıxması ilə bağlı referendum keçirilməsinin əleyhinə səs verib

25 oktyabr 2011 08:57 (UTC +04:00)

Bakı - APA-Economics. Böyük Britaniyanın İcmalar Palatası ölkənin Avropa İttifaqından çıxması ilə bağlı referendum keçirilməsini nəzərdə tutan qanun layihəsinin əleyhinə səs verib.

“APA-Economics”in “BBC News”a istinadən xəbərinə görə, referendumun lehinə 111, əleyhinə 483 deputat səs verib.

Əleyhdarların əksəriyyəti müxalif Leyboristlər Partiyasının deputatları, eləcə də hakim Mühafizəkarlar Partiyasının tərəfdaşı olan liberal-demokratlar olub. Hakim partiyanın cəmi 80 deputatı referendumun keçirilməsinə tərəfdar olub ki, bu da mühafizəkarlar daxilində məsələ ilə bağlı fikir ayrılığının olduğunu göstərir.

Səsvermədən öncə keçirilən beş saatlıq debatlarda çıxış edən Böyük Britaniyanın baş naziri Devid Kemeron deputatları Avropanın böhran yaşadığını nəzərə alaraq, referendumun əleyhinə səs verməyə çağırıb: “Əgər qonşunuzun evi yanırsa, o zaman sizin ilk görəcəyiniz iş onun söndürülməsinə çalışmaq olacaq, nəinki yanğının öz evinizə keçməsinin qarşısını almaq”.

Qeyd edək ki, Böyük Britaniyanın Avropa İttifaqından çıxması ilə bağlı referendum keçirilməsi məsələsini mühafizəkar deputat David Nuttall qaldırıb. Bunun üçün o, 100 min ölkə vətəndaşının imzasını toplayıb.