Maliyyə

Ana səhifə

Maliyyə

Asiya İnkişaf Bankı məlumatların ictimaiyyətə açıqlanmasını genişləndirəcək və sürətləndirəcək

26 oktyabr 2011 07:11 (UTC +04:00)

Bakı. Nicat Mustafayev – APA-Economics. Hesabatlılığı və şəffaflığı artırmaq məqsədi ilə Asiya İnkişaf Bankı (AİB) öz İctimai Kommunikasiya Siyasətinə etdiyi dəyişikliklərə uyğun olaraq məlumatların ictimaiyyət üçün açıqlanmasını genişləndirəcək və sürətləndirəcək.

AİB-in Azərbaycandakı daimi nümayəndəliyindən «APA-Economics»ə verilən məlumata görə, yeni dəyişikliklər AİB-ə üzv olan ölkələrin hökumətləri, özəl sektor, inkişaf tərəfdaşları, vətəndaş cəmiyyəti təşkilatları, elm ictimaiyyəti və media da daxil olmaqla 500-dən yuxarı maraq qurumlarının rəyini öyrənməklə hazırlanıb. Yenilənmiş İctimai Kommunikasiya Siyasəti 2012-ci il aprelin 2-dən qüvvəyə minəcək.

Edilən ən əhəmiyyətli dəyişikliklərdən biri ölkələr üzrə tərəfdaşlıq strategiyaları və kredit layihələri ilə bağlı məlumatların daha erkən açıqlanmasıdır. Layihələr təsdiq üçün AİB-in Direktorlar Şurasına göndərilən kimi üzv-ölkənin razılığı ilə layihə haqda məlumatlar açıqlanacaq. Əvvəllər isə Direktorlar Şurası təsdiq etmədən layihə haqda məlumat yayıla bilməzdi.

İctimai müzakirələr yolu ilə hazırlanan siyasət və strategiyalar da təsdiqlənmək üçün Direktorlar Şurasına göndərilən kimi ictimaiyyət üçün açıqlanacaq. AİB-in fəaliyyət göstərdiyi ölkələrdə məlumatların daha əlçatan edilməsi üçün AİB kreditlərlə bağlı yekun məlumatları, qrant və texniki yardım layihələri ilə bağlı sənədləri həmin ölkənin milli dilinə tərcümə edəcək.

Bundan başqa, ilk dəfə olaraq AİB bank tərəfindən maliyyələşdirilən layihələrlə bağlı aparılan auditlər haqda məlumatları da açıqlayacaq.

Vacib yeniliklərdən biri də üç beynəlxalq ekspertdən ibarət müstəqil şikayətlər komitəsinin formalaşdırılmasıdır. Yeni mexanizm AİB-dən informasiya əldə edə bilməmiş tərəflərin istəyini araşdıracaq.

Bununla yanaşı, ölkələr daxilində aparılan kommunikasiya işləri genişləndiriləcək. Burada məqsəd ictimaiyyətə AİB-in həmin ölkədə həyata keçirdiyi layihələr və fəaliyyət haqqında daha ətraflı məlumatların verilməsidir.