Maliyyə

Ana səhifə

Maliyyə

Azərbaycan Qiymətli Kağızlar üzrə Dövlət Komitəsində kollegiya iclası keçirilib

28 yanvar 2012 14:18 (UTC +04:00)

Bakı – APA-Economics. Azərbaycan Qiymətli Kağızlar üzrə Dövlət Komitəsində (QKDK) 2011-ci il üzrə fəaliyyətin yekunlarına həsr olunmuş geniş kollegiya iclası keçirilib.

Komitədən «APA-Economics»ə verilən məlumata görə, iclasda çıxış edən QKDK-nın sədri Rüfət Aslanlı dünya iqtisadiyyatının mövcud vəziyyəti haqqında məlumat verərək, ümumilikdə 2011-ci il ərzində qlobal iqtisadiyyatın artım templərində səngimə əlamətlərinin müşahidə edilməsi, dünyanın aparıcı iqtisadiyyatlarının əhəmiyyətli tənəzzül riskləri ilə müşahidə olunan çox mürəkkəb bir mərhələyə qədəm qoyduğu barədə iclas iştirakçılarını məlumatlandırıb.

R.Aslanlı qlobal iqtisadi sistemdə gərgin və qeyri-müəyyən proseslər fonunda Azərbaycan iqtisadiyyatının inkişafının ötən dövrlərdə olduğu kimi, 2011-ci ildə də davam etdiyini vurğulayıb.

Komitə sədri 2011-ci il ərzində qiymətli kağızlar bazarının fəaliyyətinin qeyri-neft sektorunun yüksək templi artımı və antiinflyasiya xarakterli pul siyasəti fonunda davam etdiyini bildirib. Daha sonra o, 2011-ci il ərzində bazarın bütün seqmentləri üzrə canlanmanın müşahidə olunduğunu və qiymətli kağızlar bazarının ticarət dövriyyəsinin ÜDM-ə nisbətinin 2011-ci il ərzində 17,7%-ə çatdığını qeyd edib. Sədr hesabat dövründə dövlət qiymətli kağızlar bazarının həcminin əhəmiyyətli dərəcədə artdığını və dövlət qiymətli kağızlar bazarında əməliyyatların sayının ötən ilin müvafiq dövrü ilə müqayisədə 1,6 dəfə, əməliyyatların həcminin isə 4,4 dəfə artaraq 6,717 mlrd. manat təşkil etdiyini bildirib.

Daha sonra QKDK-nın sədr müavini və Aparatının rəhbəri çıxış edərək, kurasiyalar üzrə struktur bölmələr tərəfindən həyata keçirilmiş tədbirlər və müvafiq fəaliyyət planlarının icra vəziyyəti barədə ətraflı məlumat veriblər. Çıxışlarda QKDK-nın cari funksional fəaliyyətinin yekunları ilə yanaşı, hesabat dövründə normativ-hüquqi bazanın təkmilləşdirilməsi və institusional tədqiqatlar sahəsində həyata keçirilmiş tədbirlər, qiymətli kağızlar bazarına dair vahid qanun layihəsinin hazırlanması, qiymətli kağızlar bazarına yeni alətlərin çıxarılması, QKDK-nın beynəlxalq əlaqələrinin gücləndirilməsi və ictimaiyyət üçün məlumatlandırma və maarifləndirmə tədbirlərinin təşkil edilməsi istiqamətində həyata keçirilmiş tədbirlər barədə ətraflı məlumat verilib.

Sonra yığıncaqda QKDK-nın struktur bölmə rəhbərləri geniş məruzələrlə çıxış edərək, hesabat dövrü ərzində həyata keçirilmiş tədbirlər, o cümlədən dövlət proqramlarının icrası barədə danışıblar.

İclasın yekununda QKDK sədri R.Aslanlı 2011-ci ili bütövlükdə Komitə üçün məhsuldar dövr kimi qiymətləndirərək, əməkdaşların daxili potensialının kəmiyyət və keyfiyyət baxımından artırılması istiqamətində yeni mexanizmlərin tətbiqinə dair müvafiq tapşırıqlar verib.