Maliyyə

Ana səhifə

Maliyyə

«Bank Nikoil» ötən il depozit portfelini 67% artırıb

31 yanvar 2012 11:45 (UTC +04:00)

Bakı. Elnur Hüseynquluyev – APA-Economics. «Bank Nikoil» ASC-nin aktivlərinin həcmi 2012-ci il yanvarın 1-nə 179,697 mln. manat təşkil edib ki, bu da 2010-cu ilin yekun göstəricisi ilə müqayisədə 0,8% çoxdur.

Bankın baş ofisindən «APA-Economics»ə verilən məlumata görə, hesabat ilində bankın kredit portfeli 0,5% artaraq 150,666 mln. manat, o cümlədən 12 ayadək verilən kreditlər 3,7 dəfə artaraq 43,120 mln. manat, 12 aydan artıq müddətə verilən kreditlər 68,600 mln. manat, istehlak kreditlərinin həcmi isə 22% artaraq 101,605 mln. manat olub.

Bu dövrdə bankın depozit portfeli 67% artaraq 109,163 mln. manat, o cümlədən müddətli depozitlər 43 dəfə artaraq 92,262 mln. manat, tələb olunanadək depozitlər 56% artaraq 16,900 mln. manat, əhalidən cəlb edilən əmanətlərin həcmi isə 71% artaraq 90,158 mln. manata çatıb.

Bu müddət ərzində bankın məcmu kapitalı 3,9% azalaraq 31,596 mln. manat, o cümlədən nizamnamə kapitalı sabit qalaraq 22,5 mln. manat təşkil edib.

Qeyd edək ki, ötən il bankın ümumi gəlirləri 7,7% artaraq 33,049 mln. manat, xərcləri isə 11% artaraq 30,150 mln. manat təşkil edib. Nəticədə, bankın əldə etdiyi mənfəətin həcmi 18% azalaraq 2,899 mln. manat olub.

Xatırladaq ki, təsisçisi Rusiyanın «UralSib» Maliyyə Korporasiyası (61%), Azərbaycanın «ISR Holding» (20%) və Rusiyanın «Uralsib İnvest» şirkəti (19%) olan «Nikoil» İKB 1997-ci ildən fəaliyyət göstərir. Cari il yanvarın 1-nə bankın 14 filialı, 21 bankomatı, 60 POS-terminalı və 452 işçisi var.