Maliyyə

Ana səhifə

Maliyyə

«MCB Leasing» şirkəti bu il layihələrin maliyyələşdirilməsini artıracaq

01 fevral 2012 08:44 (UTC +04:00)

Bakı. Elnur Hüseynquluyev – APA-Economics. Pakistanın Azərbaycanda fəaliyyət göstərən «MCB Leasing» şirkəti 2012-ci il ərzində kənd təsərrüfatı üzrə lizinq layihələrinin maliyyələşdirilməsini 4 dəfə artıraraq 1,2 mln. manata çatdıracaq. Bunu «APA-Economics»ə açıqlamasında şirkətin İdarə Heyətinin sədri Ramal Cəfərov bildirib.

R.Cəfərovun sözlərinə görə, hazırda şirkətin məcmu lizinq portfelində kənd təsərrüfatı sektorunun payı 10% təşkil edir və ilin sonunadək bu göstəricinin 15%-dək artacağı gözlənilir: «Şirkətin mütəxəssisləri tərəfindən Azərbaycan iqtisadiyyatı üzrə analiz aparılıb və nəticədə məlum olub ki, ölkənin kənd təsərrüfatı sektoru böyük üstünlüklərə malikdir. Bunu əsas gətirərək şirkətin bu il ərzində ən önəmli planı bu sahəyə aid yeni məhsullar yaratmaqdır».

R.Cəfərov bildirib ki, kənd təsərrüfatı ilə bağlı şirkət ABŞ-ın Beynəlxalq İnkişaf Agentliyinin (USAID) «Development Credit Authority» layihəsinə qoşulmaq niyyətindədir və bu istiqamətdə danışıqlar aparılır: «Layihədə kənd təsərrüfatı ilə bağlı avadanlıqların, soyuducu kameraların, bu sahəyə aid texnikaların maliyyələşdirilməsi nəzərdə tutulur. Layihənin şərtlərinə görə, avadanlıqlar, soyuducu kameraları, kənd təsərrüfatı texnikaları lizinqə verildikdən sonra ödəniş prosesində müştəri ilə hər hansı bir problem yarandıqda USAID bu problemlərə görə 50% məbləğində zaminlik öhdəliyi götürür».

R.Cəfərov Azərbaycan məhsullarının, xüsusən də meyvələrin Avropa bazarlarına çatdırılması sahəsində müəyyən layihələrin də maliyyələşdiriləcəyini bildirib. Şirkət Azərbaycanda məhsulun yetişdirmə prosesindən başlayaraq, onun Avropa bazarına çatdırılmasınadək istənilən şirkəti müvafiq avadanlıqlarla təmin edə bilər.

R.Cəfərovun sözlərinə görə, lizinq bazarındakı çətin vəziyyəti (şirkətlərin daxildən və ya xaricdən vəsait cəlb etməsi, vergi və s. ilə bağlı problemlər) nəzərə alaraq «MCB Leasing» şirkəti bu il ərzində faiz dərəcələrini artırmayacaq və əvvəlki illərdə olduğu kimi illik 18-22% civarında olacaq.

Xatırladaq ki, ki, «MCB Leasing» şirkəti 2009-cu ilin oktyabr ayında qeydiyyatdan keçib, lizinq layihələrinin maliyyələşdirilməsinə isə 2010-cu ilin iyun ayından başlayıb. Şirkətin səhmdar kapitalında 95% Pakistanın «MBC Bank»ına, 5% isə yerli fiziki şəxsə məxsusdur. Cari il yanvarın 1-nə şirkətin lizinq portfeli 4,1 mln. manat, nizamnamə kapitalı isə 842,5 min manat təşkil edir.