Maliyyə

Ana səhifə

Maliyyə

Qusarda vergi ödəyicilərinə xidmət mərkəzi istifadəyə verilib - YENİLƏNİB

Qusarda vergi ödəyicilərinə xidmət mərkəzi istifadəyə verilib - <font color=red>YENİLƏNİB</font>

01 fevral 2012 10:19 (UTC +04:00)

Qusar. Vəli Turan - APA. Bu gün Qusar rayonunda Azərbaycan Vergilər Nazirliyinin 3 saylı Ərazi Vergilər İdarəsinin vergi ödəyicilərinə xidmət mərkəzi istifadəyə verilib.

APA-nın şimal bürosunun verdiyi məlumata görə, açılış mərasimində Vergilər Nazirliyinin rəsmiləri, sahibkarlar və Qusar rayon İcra Hakimiyyətinin nümayəndələri iştirak edib.

Vergilər Nazirinin müşaviri Ələkbər Məmmədov ölkə prezidentinin Vergilər Nazirliyi qarşısında qoyduğu tələblərə uyğun olaraq Azərbaycanda partnyorluq, səmərəli dövlət-biznes münasibətlərinin qurulması istiqamətində görülən işlər və bu sahədə 2011-ci ildə həyata keçirilən müxtəlif layihələr barədə tədbir iştirakçılarına məlumat verib. Qeyd olunub ki, sahibkarların maarifləndirilməsi, onlara müxtəlif növ hüquqi, informasiya, metodiki və s. köməkliyin göstərilməsini təmin edən xidmət mərkəzləri pulsuz fəaliyyət göstərir. Bu xidmət mərkəzlərində vergi ödəyiciləri öz şəxsi hesab vərəqəsindəki məlumatlara baxa, büdcəyə olan vergi borcu, onun yaranma səbəbləri və digər məsələlər barədə zəruri məlumatlar əldə edə bilərlər.

Daha sonra Quba şəhərində 3 saylı Ərazi Vergilər İdarəsinin əhatə dairəsində fəaliyyət göstərən vergi ödəyiciləri ilə görüş keçirilib. Tədbiri giriş sözü ilə açan Ə.Məmmədov bildirib ki, inkişaf edən müasir vergi sisteminin əsas fəaliyyət istiqamətlərindən biri də ölkəmizdə vergi ödəyicilərinin maarifləndirilməsi, məlumatlandırılması və ünvanlı vergi xidmətinin göstərilməsi, sahibkarlarla münasibətlərin bütövlükdə yenidən qurulması ölkədə əlverişli vergi mühitinin formalaşmasıdır.

Vergi siyasəti və strateji araşdırmalar Baş İdarəsinin rəisi Akif Musayev vergi sistemində aparılan köklü struktur islahatları, Vergi Məcəlləsinin təkmilləşdirilməsi, səmərəli və funksional əsasda fəaliyyət göstərən yeni idarəetmə sisteminin təşkili barədə məlumat verib, vergi orqanları ilə vergi ödəyiciləri arasında texnoloji baxımdan mükəmməl elektron əlaqələr sisteminin yaradılmasının, müasir səviyyəli təhlil bazasına malik informasiya sistemlərinin qurulmasının zamanını tələbi olduğunu qeyd edib.

Vergi ödəyicilərinə xidmət idarəsinin rəisi Elçin Məmmədov vergi ödəyicilərinə göstərilən xidmətlərin çeşidi, 2011-2015-ci illəri əhatə edən “Vergi orqanları tərəfindən vergi ödəyicilərinə göstərilən xidmətlərin inkişafı Konsepsiyası”, qarşıda duran vəzifələr haqqında tədbir iştirakçılarına ətraflı məlumat verərək deyib ki, elektron ödəniş sisteminin və bəyannamələrin əvvəlcədən doldurulması sisteminin yaradılması, bütün bəyannamələrin BTP proqramından istifadə etmədən onlayn rejimdə göndərilməsi, ərizələrin onlayn rejimdə göndərilməsi, universal telefon məlumat xidmətinin yaradılması, vergi ödəyicilərindən daxil olmuş standart SMS-lərin avtomatik olaraq SMS vasitəsilə cavablandırılması mexanizminin yaradılması, vergi yoxlamalarının elektron şəkildə aparılması kimi tədbirlər yaxın dövrlərdə həyata keçirilməsi nəzərdə tutulan məsələlərdəndir.

Tədbirdə vergi ödəyicilərini maraqlandıran suallar cavablandırılıb, onlara vergi sistemində tətbiq edilən yeniliklər barədə müvafiq izahatlar verilib.

Hazırda respublikanın regionlarında müasir avadanlıqlarla və sürətli kommunikasiya sistemi ilə təchiz edilmiş 30 belə xidmət mərkəzi fəaliyyət göstərir.