Maliyyə

Ana səhifə

Maliyyə

Azərbaycan İqtisadi İnkişaf Nazirliyi və Belarus İqtisadiyyat Nazirliyi arasında əməkdaşlıq haqqında saziş imzalanıb

22 fevral 2012 16:46 (UTC +04:00)

Bakı - APA. Azərbaycanda səfərdə olan Belarusun Respublikasının iqtisadiyyat naziri Nikolay Snopkovun başçılıq etdiyi nümayəndə heyəti bu gün Fəxri Xiyabana gedərək Heydər Əliyevin məzarını ziyarət edib.

APA-nın xəbərinə görə, qonaqlar həmçinin Şəhidlər Xiyabanında Azərbaycanın müstəqilliyi və ərazi bütövlüyü uğrunda canlarından keçmiş qəhrəmanlarımızın xatirəsini ehtiramla yad ediblər.

Baş nazirin birinci müavini, Azərbaycan və Belarus arasında Hökumətlərarası Komissiyanın həmsədri Yaqub Eyyubov Belarusun iqtisadiyyat naziri Nikolay Snopkovu qəbul edib. Ölkəmizə səfər çərçivəsində Belarusun iqtisadiyyat naziri Nikolay Snopkov maliyyə naziri Samir Şərifovla da görüşüb.

Bu gün Azərbaycan İqtisadi İnkişaf Nazirliyinin dəstəyi, Azərbaycanda İxracın və İnvestisiyaların Təşviqi Fondunun (AZPROMO) təşkilatçılığı ilə Belarusun iqtisadiyyat naziri Nikolay Snopkovun yerli iş adamları ilə görüşü keçirilib. Tədbirdə rəsmi şəxslərlə yanaşı, Azərbaycan tərəfindən daşınmaz əmlak və tikinti, logistika, kənd təsərrüfatı, qida sənayesi, maliyyə və digər sahələrdə fəaliyyət göstərən 20-ə yaxın şirkətin nümayəndəsi iştirak edib. N.Snopkov Belarus iqtisadiyyatı barədə məlumat verib, yerli iş adamlarını maraqlandıran sualları cavablandırıb. Görüşdə qonağa Azərbaycan iqtisadiyyatı, AZPROMO-nun, Azərbaycan İnvestisiya Şirkətinin, Sahibkarlığa Kömək Milli Fondunun fəaliyyəti barədə məlumat verilib.

Həmin gün İqtisadi İnkişaf Nazirliyində Belarusun iqtisadiyyat naziri Nikolay Snopkovun başçılıq etdiyi nümayəndə heyəti ilə görüş keçirilib. Görüşdə Azərbaycan və Belarus arasında mövcud iqtisadi əlaqələr, əməkdaşlığın inkişaf perspektivləri müzakirə edilib. Görüşün sonunda “Azərbaycan Respublikasının İqtisadi İnkişaf Nazirliyi və Belarus Respublikasının İqtisadiyyat Nazirliyi arasında əməkdaşlıq haqqında” saziş imzalanıb. Sənədi Azərbaycan tərəfdən iqtisadi inkişaf naziri Şahin Mustafayev, Belarus tərəfdən isə bu ölkənin iqtisadiyyat naziri Nikolay Snopkov imzalayıb. Sənəddə ikitərəfli iqtisadi əlaqələrin genişləndirilməsi, ticarət, investisiya, sahibkarlığın inkişafı sahəsində məlumat və təcrübə mübadiləsi, qarşılıqlı maraq kəsb edən proqram və layihələrin həyata keçirilməsi, eləcə də iş adamları arasında ikitərəfli görüşlərin, biznes-forum və seminarların təşkili nəzərdə tutulur.