Maliyyə

Ana səhifə

Maliyyə

Azərbaycanda ünvanlı sosial yardım alan şəxslərin əmlakı dövlət hesabına sığortalanacaq

27 fevral 2012 09:21 (UTC +04:00)

«APA-Economics»in məlumatına görə, Nazirlər Kabineti «Ünvanlı dövlət sosial yardımı almaq hüququna malik olan aztəminatlı ailələrə məxsus yaşayış evlərinin və mənzillərin icbari sığortası üzrə sığorta haqlarının dövlət büdcəsinin vəsaitləri hesabına ödənilməsi Qaydası»nı təsdiqləyib.

Qaydaya əsasən, aztəminatlı ailələrə məxsus yaşayış evləri və mənzillərin sığortalanması üzrə müvafiq icbari sığorta müqavilələri bağlamış sığortaçı həmin müqavilələrdə nəzərdə tutulan sığorta haqlarını dövlət büdcəsi vəsaitləri hesabına almaq üçün Maliyyə Nazirliyinə müraciət etməlidir. Bu zaman sığorta şirkəti Nazirliyə aztəminatlı ailəyə məxsus yaşayış evi və ya mənzilin icbari sığortalanması faktını təsdiq edən sığorta şəhadətnaməsinin surətini, həmin evin və ya mənzilin aztəminatlı ailəyə məxsus olmasını təsdiq edən sənədin surətini təqdim etməlidir. Nazirlik bu müraciətə 25 gün ərzində baxaraq çatışmazlıq aşkar etmədikdə həmin müddətdə sığorta haqlarını sığortaçının bank hesabına köçürür. Təqdim olunmuş sənədlərdə təhrif olunmuş məlumatlar olduqda və sənədlər tam təqdim olunmadıqda Nazirlik sığorta haqqının ödənilməsindən imtina edir.

Qaydaya görə, sığorta haqlarının ödənilməsinə ayrılan və Nazirliyin xüsusi hesabında saxlanılan vəsait bu Qaydada nəzərdə tutulmamış digər məqsədlər üçün istifadə edilə bilməz. Sığorta haqlarının ödənilməsinə ayrılan maliyyə yardımının il ərzində istifadə edilməyən hissəsi ilin sonunda dövlət büdcəsinə qaytarılır.