Maliyyə

Ana səhifə

Maliyyə

Bakıda maliyyə təşkilatlarının rəhbər işçiləri üçün skorinq sistemi ilə bağlı seminar keçirilib

13 mart 2012 13:05 (UTC +04:00)

Bakı. Elnur Hüseynquluyev – APA-Economics. Bu gün Bakıda «Avtomatik alətlər, skorinq və kredit bürosu vasitəsilə maliyyənin optimallaşdırılması» mövzusunda maliyyə təşkilatlarının rəhbər işçiləri üçün seminar keçirilib.

«APA-Economics»in məlumatına görə, maliyyə təşkilatları, o cümlədən bank işçiləri, mikro-kredit təşkilatları, lizinq və sığorta şirkətlərinin işçiləri üçün keçirilən seminarda Azərbaycan Mərkəzi Bankı (AMB) Mərkəzləşdirilmiş Kredit Reyestri Xidmətinin direktoru Elçin Həbibov bildirib ki, skorinq xidmətinin tətbiqi əhaliyə kredit vəsaitlərinə çıxış imkanı yaratmaqla yanaşı ölkənin maliyyə vəziyyətinin daha da təkmilləşdirilməsinə kömək edir.

E.Həbibovun sözlərinə görə, Mərkəzi Bank Mərkəzləşdirilmiş Kredit Reyestri Xidmətindən başqa özəl kredit bürolarının da yaradılmasında maraqlıdır. Özəl kredit bürolarının yaradılması istiqamətində AMB və IFC birgə işi davam etdirir.

Tədbirdə İtaliyanın CRIF şirkətinin baş kredit analitiki Radek Soukup bildirib ki, müxtəlif ölkələrdə vəsaitlərin verilməsi və yığılması istiqamətində müxtəlif skorinq modelləri tətbiq olunur. Bu modellərin işlənməsi ilə yanaşı onların monitorinqinin də aparılması vacibdir. «Bəzi ölkələrdə bu monitorinqlər aparılmır. Skorinq - maliyyə bazarında istənilən dəyişikliyi, həmçinin əhalinin davranışlarını müəyyən edən bir maliyyə alətidir. Bu alət vasitəsi ilə ayrı-ayrı riskləri qiymətləndirmək, eyni zamanda müştərilərin risklilik dərəcəsini müəyyən etmək olur. Bununla da sistem müştərinin defolta (borcalanın kreditor qarşısında ödəmə öhdəliklərin pozulması) uğrama ehtimalı və aşağı, daha riskli sahələri müəyyənləşdirməyə köməklik edir. Skorinq sistemində hansı müştəriyə hansı məbləğdə kreditin ayrılması məsələsinə aydınlıq gətirir», - deyə R.Soukup qeyd edib.

Qeyd edək ki, seminarda kreditin müddəti ərzində skorinq, skorinq metodologiyası, kreditin verilməsi üzrə skorinq, kredit bürosunun skorinqi digər mövzular üzrə təqdimatlar olub.

Xatırladaq ki, seminar IFC-nin İsveçrə hökuməti ilə birgə həyata keçirtdiyi «Mərkəzi Asiya maliyyə bazarlarının infrastrukturu məsləhət xidmətləri Layihəsi»nin bir hissəsidir. Seminarın əsas məqsədi maliyyə təşkilatlarını kredit büro xidmətlərindən effektiv istifadə etməyə hazırlamaq və ölkənin maliyyə vəziyyətinin daha da təkmilləşdirilməsində kömək olmaqdır.