Maliyyə

Ana səhifə

Maliyyə

Azərbaycanda bank kassa dövriyyəsi 48% artıb

16 mart 2012 11:32 (UTC +04:00)

Bakı. Vahab Rzayev – APA-Economics. Azərbaycan bank sistemində kassa dövriyyəsinin mədaxil hissəsi 2012-ci ilin yanvar ayında 2,358 mlrd. manat, məxaric hissəsi isə 1,990 mlrd. manat təşkil edib. Azərbaycan Mərkəzi Bankından «APA-Economics»ə verilən məlumata görə, kassa dövriyyəsinin mədaxil hissəsi 2011-ci ilin yanvarına nisbətən 47,6%, məxaric hissəsi isə 45,1% artıb.

Beləliklə, hesabat ayının yekununda bank kassa dövriyyəsində 368 mln. manat həcmində mənfi saldo yaranıb və dövr ərzində 436 mln. manat həcmində pul emissiyası həyata keçirilib. Bu, 2011-ci ilin yanvar göstəricisindən 90% çoxdur.

Bank kassa dövriyyəsinin mədaxilinin əsas hissəsi bankların hüquqi və fiziki şəxslərlə maliyyə əməliyyatları üzrə daxilolmalarının payına düşür. Belə ki, bu mənbədən bank kassalarına 1,463 mlrd. manat və ya ümumi mədaxilin 62%-i daxil olub. Digər iri mənbələr sırasında hüquqi şəxslərdən daxilolmalar (505 mln. manat və ya 21,4%), fiziki şəxslərdən daxilolmalar (236 mln. manat və ya 10,0%) var.

Bank kassa dövriyyəsinin məxaric hissəsində hüquqi və fiziki şəxslərlə maliyyə əməliyyatları üzrə ödənişlərin payına 816 mln. manat və ya 41,0%, hüquqi şəxslər və hüquqi şəxs yaratmadan sahibkarlıq fəaliyyəti həyata keçirən fiziki şəxslər üzrə ödənişlərin payına 592 mln. manat və ya 29,8%, bankomatlara pul qoyuluşunun payına 509 mln. manat və ya 25,6% düşür.