Maliyyə

Maliyyə

Azərbaycanda çirkli pullara qarşı mübarizə üçün e-tədris sistemi hazırlanıb

23 oktyabr 2012 10:15 (UTC +04:00)

Bakı. Əli Əhmədov – APA-Economics. Azərbaycan Mərkəzi Bankı yanında Maliyyə Monitorinqi Xidməti (MMX) ABŞ Beynəlxalq İnkişaf Agentliyi (USAID) ilə birlikdə bu gün Bakıda müxtəlif dövlət və maliyyə təşkilatlarına özünün yeni elektron-tədris (e-tədris) sistemini təqdim edib.

«APA-Economics»in məlumatına görə, USAID-in Azərbaycandakı missiyası ilə birgə hazırlanan e-tədris sisteminin məqsədi Çirkli Pulların Yuyulması/Terrorçuluğun Maliyyələşdirilməsinə qarşı Mübarizə (PY/TMM) və onun tələbləri ilə bağlı məlumat və biliklərin daha geniş kütləyə daha səmərəli və effektiv metodlarla çatdırılmasıdır.

Tədbirdə MMX-nin direktoru Adışirin Qasımov qeyd edib ki, bütün ölkədə PY/TMM ilə bağlı ictimaiyyətin hüquqi mədəniyyətinin və institusional potensialın gücləndirilməsində belə mütərəqqi alətlər vacib rol oynayır.

Tədbirdə çıxış edən USAID-in Azərbaycandakı missiyasının direktoru Maykl Qrin pulların yuyulmasına qarşı mübarizədə əsas elementlərindən biri kimi bilik əldə edilməsinin və onunla bölüşmənin vacib olduğunu vurğulayıb. O, əlavə edib ki, e-tədris sistemi materialları öyrənmək üçün insanlara stimul yaradır və rəsmi təlimdən keçmək, sual-cavabda iştirak etmək və nəticə olaraq terrorçuluğun maliyyələşdirilməsinə qarşı mübarizə üzrə ekspert olmaq imkanı verir.

Portalda pulların yuyulması və terrorçuluğun maliyyələşdirilməsinin yaratdığı təhlükələr barədə geniş məlumatlar və bu növ fəaliyyətlərin qarşısının alınmasında hökumətin rolu barədə izahat xarakterli təqdimatlardan əlavə, PY/TMM qaydaları, beynəlxalq standartlar və qabaqcıl təcrübə, həmçinin Azərbaycanda qəbul edilmiş formal standartlar barədə məlumatlar yerləşdirilib.

Burada bankların müvafiq əməkdaşları PY/TMM ilə bağlı kurs keçərək MMX tərəfindən bu sahədə ekspert olduqlarını təsdiq edən sertifikat ala bilər. Kurs zamanı istifadəçilərin biliyini yoxlamaq üçün onlar bir sıra modullardan və kiçik yoxlamalardan keçir. Bu zaman MMX hər bir istifadəçinin irəliləyişini izləyə bilər. Kursu uğurla bitirən istifadəçilər MMX tərəfindən aparılan imtahanda iştirak edə bilər. Sistemin digər faydaları ilə yanaşı, onun yardımı ilə PY/TMM qaydalarının tələbləri barədə istifadəçilərin biliyinin artırılması potensial olaraq pulların yuyulması və terrorçuluğun maliyyələşdirilməsi üçün istifadə edilən tranzaksiyalar barədə maliyyə təşkilatlarının könüllü şəkildə hesabat verməsinə şərait yaradacaq.

M.Qrin bildirib ki, elektron tədris portalı istifadəçilərə əvvəla pulların leqallaşdırılması və terrorizmin maliyyələşdirilməsinə qarşı mübarizə haqqında ümumi məlumatların internet vasitəsilə geniş ictimaiyyətə çatdırılmasına kömək edəcək. Eyni zamanda bu sahədə çalışan ekspert və peşəkarlar bu portal vasitəsilə cinayətkarlar tərəfindən pulları leqallaşdırmaq üçün istifadə etdikləri üsulları aşkar etməyə imkan verəcək. «Bu portalın əsas istifadəçiləri təbii ki, bank işçiləri olacaq, amma ümumilikdə istənilən şəxs, Azərbaycanın hər bir vətəndaşı bu portaldan istifadə edəcək, bu sahədə bilik əldə edə biləcək», - deyə USAID təmsilçisi vurğulayıb.

Tədbirdə həmçinin MMX-nin direktor müavini Anar Salmanovun müəllifi olduğu və bu yaxınlarda USAID-in maliyyə dəstəyi ilə dərc edilmiş «Cinayət yolu ilə əldə edilmiş pul vəsaitlərinin və ya digər əmlakın leqallaşdırılmasına və terrorçuluğun maliyyələşdirilməsinə qarşı mübarizə haqqında Azərbaycan Respublikası qanununun kommentariyası» adlı kitabı da təqdim edilib.