Maliyyə

Maliyyə

Gələn il Bakıda IV Eurosai/Arabosai konfransı keçiriləcək

26 oktyabr 2012 10:32 (UTC +04:00)

Bakı. Elnur Hüseynquluyev – APA-Economics. Gələn il Hesablama Palatasının təşkilatçılığı ilə Bakıda keçiriləcək IV Eurosai/Arabosai Birgə Konfransına hazırlıq çərçivəsində palatanın nümayəndə heyəti Abu-Dabidə (Birləşmiş Ərəb Əmirlikləri) səfərdə olub.

Palatadan «APA-Economics»ə verilən məlumata görə, səfərin əsas məqsədi III Eurosai/Arabosai birgə konfransına ev sahibliyi etmiş BƏƏ-nin Dövlət Audit Qurumunun Konfransın keçirilməsi ilə bağlı texniki və təşkilati məsələlər üzrə əldə etdikləri təcrübəni bölüşmək olub.

Nümayəndə heyətinin əvvəlcə BƏƏ-nin Dövlət Audit Qurumunun prezidenti Harib Saeed Al Amini ilə görüşü keçirilib, prezident tərəfindən iki ölkənin Ali Audit Qurumları arasında işgüzar əlaqələrin daha da genişləndirilməsində maraqlı olmaları xüsusi vurğulanıb, III Eurosai/Arabosai birgə konfransın keçirilməsində bilavasitə iştirak etmiş işçi qrupların üzvlərinə görüşün təşkili ilə bağlı müvafiq tapşırıqlar verilib.

Sonra nümayəndə heyəti ilə işçi qrupların üzvləri arasında konfransa hazırlıq, onun gedişi və yekunlaşdırılması mərhələləri üzrə aidiyyəti məsələlər müzakirə olunub, yarana biləcək çətinliklər və texniki problemlər barədə işçi qrupların üzvləri tərəfindən tövsiyələr verilib.