Maliyyə

Maliyyə

«AccessBank» 10 illik yubileyini qeyd edir

30 oktyabr 2012 15:02 (UTC +04:00)

Bakı. Elnur Hüseynquluyev - APA-Economics. Bu günlərdə «AccessBank» QSC fəaliyyətinin 10 illiyini qeyd edib.

Bankın baş ofisindən «APA-Economics»ə verilən məlumata görə, bank 2002-ci il oktyabrın 10-da fəaliyyətə başlayıb. Yaradıldığı gündən etibarən bankın məqsədi özəl sektor üçün etibarlı bank olmaqla, müəssisələrə və onların sahiblərinə, eləcə də kiçik və orta gəlirli ailələrə bütün zəruri bank xidmətləri göstərməkdən ibarət olub. İlk illərdə bank Azərbaycan Mikromaliyyələşdirmə Bankı adı ilə fəaliyyət göstərib, daha sonra 2008-ci ildə «AccessBank»a rebrendinq edilib.

On illik fəaliyyəti ərzində 600 mln. ABŞ dolları həcmində ümumi aktivləri və 500 mln. ABŞ dollarına yaxın kredit portfeli ilə bank böyük nailiyyətlər əldə edib. Bank ölkənin ən yaxşı 10 bankı siyahısına daxildir və özünün 120 min müştərisinə orta, kiçik və mikro sahibkarlara, o cümlədən pərakəndə seqmentdəki fiziki şəxslərə rəqabətə davamlı bank məhsulları təqdim edərək əhəmiyyətli tərəfdaşa çevrilib.

Bank regionlarda geniş filiallar şəbəkəsi quraraq, bütün ölkə ərazisində kiçik şəhər və yaşayış məntəqələrində əsasən kənd təsərrüfatı ilə məşğul olan minlərlə müştəriyə xidmət göstərir. Təxminən hər il bank öz sabit və keyfiyyətli gəliri əsasında məcmu kapitalını artıra bilir və beləliklə, bu gün 128 mln. ABŞ dolları məbləğini ötərək kapitallaşma üzrə ölkənin ən iri 5 bankı sırasına daxildir.

Öz fəaliyyəti dövründə biznesin şəffaf surətdə həyata keçirilməsi və bazarda malik olduğu sabit mövqe «AccessBank»ın Azərbaycanda sabit bank kimi nüfuzunun möhkəmləndirilməsinə şərait yaradıb. Bunun bir göstəricisi kimi dünyanın ən qabaqcıl reytinq agentliklərindən olan «Fitch Ratings» agentliyi 2008-ci ildə «AccessBank»ın reytinqini Azərbaycan üçün ən yüksək olan «BB+» səviyyəsində sabit proqnozla qiymətləndirib.

Qeyd edək ki, bankın səhmdarları sırasına Avropa Yenidənqurma və İnkişaf Bankı, Beynəlxalq Maliyyə Korporasiyası, Qara Dəniz Ticarət və İnkişaf Bankı, KFW, «Access Microfinance Holding» və Almaniyanın «LFS Financial Systems GmbH» şirkəti daxildir.