Maliyyə

Maliyyə

Azərbaycan parlamenti gələn həftə büdcə zərfinin müzakirəsinə başlayır

31 oktyabr 2012 10:36 (UTC +04:00)

«APA-Economics»in məlumatına görə, bunu bildirən komitə sədri Ziyad Səmədzadə qeyd edib ki, noyabrın 13-də isə büdcə zərfinin parlamentin plenar iclasında müzakirəyə çıxarılması nəzərdə tutulur.

Dövlət büdcəsində neftin baza qiymətinin 100 dollar/barel səviyyəsində nəzərdə tutulmasına münasibət bildirən Z.Səmədzadə vurğulayıb ki, bu hədd riskli deyil və onun müəyyən edilməsi çərçivəsində neftin qiymət dinamikası təhlil olunub.

Qeyd edək ki, gələn il üçün büdcə gəlirləri 19 154 mln. manat, xərcləri 19 810 mln. manat, kəsiri isə 656 mln. manat səviyyəsində nəzərdə tutulur. Büdcə gəlirləri üzrə 12,4%, xərcləri üzrə isə 12,1% artım gözlənilir.

Büdcə gəlirlərinin strukturunda 11 350 mln. manat və ya 59,3%-i Dövlət Neft Fondundan daxilolmalar, 6 400 mln. manat və ya 33,4%-i Vergilər Nazirliyi üzrə daxilolmalar, 1 380 mln. manat və ya 7,2%-i Dövlət Gömrük Komitəsi üzrə daxilolmalar, 5 mln. manatı dövlət əmlakının icarəyə verilməsindən daxilolmalar və 19 mln. manatı sair daxilolmaların payına düşür. Vergilər Nazirliyinin xətti ilə daxilolmaların 3 760 mln. manatı və ya 58,8%-i qeyri-neft sektorunun payına düşür. Vergi daxilolmalarının həcmi 2012-ci ilin proqnozuna nisbətən 8,3% çox nəzərdə tutulur. Dövlət Gömrük Komitəsinin xətti ilə daxilolmaların həcmi isə 212-ci ilin proqnozuna nisbətən 15% çox nəzərdə tutulur.

Eyni zamanda xərclərinin strukturunda əsas yeri dövlət əsaslı vəsait qoyuluşu tutacaq. Bu xərclərin həcmi 6 915,2 mln. manat və ya ümumi büdcə xərclərinin 34,9%-ni təşkil edir. Dövlət əsaslı vəsait qoyuluşların illik artım tempi 19,8%-lik səviyyəsində gözlənilir.

Bundan əlavə büdcə xərclərinin strukturunda əsas xərclərinin sırasında 1 813,6 mln. manat sosial müdafiə və sosial təminat xərcləri, 1 802 mln. manat ümumi dövlət xidmətləri üzrə xərcləri, 1 530,4 mln. manat təhsil xərcləri, 1 528,6 mln. manat müdafiə xərcləri, 1 081,8 mln. manat məhkəmə hakimiyyəti, hüquq-mühafizə və prokurorluq xərclərini qeyd etmək olar. Bu ilin proqnozlarına nisbətən sosial müdafiə və sosial təminat xərcləri gələn il 1,6%, ümumi dövlət xidmətləri üzrə xərcləri 52,7%, təhsil xərcləri 1,2%, müdafiə xərcləri 8,6%, məhkəmə hakimiyyəti, hüquq-mühafizə və prokurorluq xərclərinin 12,2% səviyyəsində artım gözlənilir.