İslam maliyyəsi sahəsində təkaful ən önəmli və prioritet məsələlərdən biridir. Çünki istənilən İslam maliyyə alətində, xüsusilə də aktiv əsaslı (asset-based) investisiyalarda sığortalanma zərurəti yaranır. Bu ehtiyac İslam maliyyəsində İslam sığortası vasitəsilə, yəni təkaful sistemi ilə təmin olunur.
Bu barədə "APA-Economics"ə açıqlamasında "Saf Təkaful Sığorta və Təkrarsığorta Brokeri" MMC-nin direktoru Eyvaz Cəfərli deyib.
Onun sözlərinə görə, təkaful İslam sığortası modelidir və ənənəvi sığortadan fərqli olaraq müəyyən spesifik prinsiplərə əsaslanır: "İslam maliyyəsində haram hesab edilən əsas elementlər - faiz (riba), qeyri-müəyyənliyin (gharar) alqı-satqısı və qumar elementli qazanc - təkaful modelində istisna edilir. Bu səbəbdən sistem İslam prinsiplərinə uyğun və halal hesab olunur".
O qeyd edib ki, təkaful sisteminin əsas fərqləndirici xüsusiyyəti ondan ibarətdir ki, sığorta riski şirkət tərəfindən deyil, iştirakçılar arasında bölüşdürülür. Bu məqsədlə təkaful fondu yaradılır. İştirakçılardan toplanan vəsaitin müəyyən hissəsi idarəetmə haqqı kimi şirkət tərəfindən tutulur, qalan hissə isə təkaful fonduna yönəldilir:
"Fond hesabına sığorta hadisələri üzrə ödənişlər həyata keçirilir. İl sonunda fond qalığı formalaşarsa, həmin vəsait iştirakçıların payı hesab olunur və gələcək sığorta müqavilələrində əvəzləşdirilə bilər. Bu mexanizm sistemin əsas üstünlüklərindən biridir".
"Bundan əlavə, ölkədə İslam maliyyəsi sahəsinin inkişafı ilə bağlı müsbət dinamika müşahidə olunur. Hazırda İslam İnkişaf Bankının illik tədbirləri və İslam İqtisadi Forumu çərçivəsində özəl sektorla geniş görüşlər keçirilir ki, bu da İslam iqtisadiyyatının inkişafına töhfə verir. Eyni zamanda sukuk və digər İslami investisiya alətlərinin tətbiqi istiqamətində işlər aparılır və yaxın zamanda onların tətbiqinə başlanılması gözlənilir," - deyə o qeyd edib.
Eyvaz Cəfərli vurğulayıb ki, bu inkişaflar nəticəsində İslam maliyyə institutlarının investisiya imkanları genişlənəcək: "Fond vəsaitlərinin investisiyasından əldə olunan gəlirlər müəyyən idarəetmə haqqı çıxıldıqdan sonra yenidən iştirakçıların fonduna yönəldiləcək və beləliklə, iştirakçılar investisiya gəlirlərindən də əlavə fayda əldə edəcəklər".
Bizi Telegram-da izləyin
t.me/apa_az
Bizi Instagram-da izləyin
Bizi TikTok-da izləyin
Bizi Facebook-da izləyin
Bizi X-da izləyin
