Maliyyə

Maliyyə

Azərbaycanda nağd manat kütləsi ötən il 29% artıb

13 fevral 2013 14:05 (UTC +04:00)

Bakı. Vahab Rzayev – APA-Economics. Azərbaycanda geniş mənada pul kütləsinin (M3 aqreqatı) həcmi 2013-cü il yanvarın 1-nə 16 775,3 mln. manat təşkil edib ki, bu da 2012-ci ilin əvvəlinə nisbətən 2 872,1 mln. manat və ya 20,7% çoxdur.

Azərbaycan Mərkəzi Bankından «APA-Economics»ə verilən məlumata görə, təkcə dekabr ayında geniş mənada pul kütləsi 987,6 mln. manat və ya 6,3% artıb.

Qeyd edək ki, M3 aqreqatının strukturuna banklardan kənarda nağd pullar, tələb olunanadək və müddətli əmanət və depozitlər daxildir.

Pul kütləsinin M2 aqreqatı (manat pul kütləsi) ötən il ərzində 2 809,2 mln. manat və ya 25,5% artaraq 13 806,4 mln. manata çatıb:

(mln. AZN)

	01.01.2012	01.01.2013
M0 (nağd pullar)	7 158,2	9 256,6
M1 (nağd pul, tələb olunanadək əmanət və depozitlər)	8 824,8	11 107,9
M2 (nağd pul, tələb olunanadək və manatla müddətli əmanət və depozitlər)	10 997,2	13 806,4
M3 (nağd pul, tələb olunanadək və müddətli əmanət və depozitlər)	13 903,2	16 775,3

Göründüyü kimi, il ərzində nağd manat kütləsi 2 098,4 mln. manat və ya 29,3% artıb. Beləliklə, manat pul kütləsinin artımının 75%-i nağd pulların artımının payına düşüb.

Ölkədə nağdlaşma səviyyəsi bu ilin yanvarın 1-nə 67,1%-ə bərabər olub ki, bu da illik müqayisədə 2 faiz bəndi çoxdur.

Qeyd edək ki, 2010-2011-ci illərlə müqayisədə manat kütləsinin artım tempi müəyyən dərəcədə azalıb. Belə ki, 2010-cu ildə artım 34,5%, 2011-ci ildə 32,5% təşkil edib.