Maliyyə

Maliyyə

Bakı Fond Birjası ilə «İnvestAz» şirkəti arasında likvidliyin təminatı üzrə saziş imzalanıb

07 oktyabr 2013 11:17 (UTC +04:00)

Bakı. Vahab Rzayev – APA-Economics. Bu gün Bakı Fond Birjası (BFB) ilə «İnvestAz» şirkəti arasında likvidlik üzrə market-meyker sazişi imzalanıb. «APA-Economics»in xəbər verdiyi kimi, sazişə əsasən, «İnvestAz» şirkəti Birjanın «Meta Trader 4» platforması əsasında FOREX bazarının alətləri üzrə əqdlərdə likvidlik təminatçısı olacaq.

Müqaviləni BFB-nin İdarə Heyətinin sədri Əmin Muradov və «İnvestAz» şirkətinin direktoru Elşən Quliyev imzalayıblar. Likvidlik təminatçısı olaraq şirkət 44 valyuta cütlüyü və qiymətli metal və digər əmtəələr üzrə 3 fərq müqaviləsi (CFD) üzrə alış və satış kotirovkaları təmin edəcək. Kotirovkalar həftənin 5 günü 24 saat ərzində elan ediləcək. Qeyd edilir ki, likvidlik təminatçısı əqdlər üzrə hesablaşmaları ölkə daxilində təşkil edəcək.

Həmçinin bildirilir ki, «Meta Trader 4» ticarət platforması qabaqcıl texnoloji xüsusiyyətlərə malik olmaqla yanaşı, yerli maliyyə bazarları iştirakçılarının tələblərinə tam olaraq uyğunlaşdırılıb. Platformanın hazırlanması zamanı istifadə olunmuş mütərəqqi texniki həllər məlumatların qorunması və təhlükəsizliyi, sistemin dayanıqlı fəaliyyəti, həmçinin hesablaşmaların ölkə daxilində həyata keçirilməsinə imkan verir.