MDB

Ana səhifə

MDB

ABŞ Rusiyanı ölkənin milli təhlükəsizliyinə əsas təhdid mənbəyi hesab edir

18 fevral 2009 10:32 (UTC +04:00)

APA-nın “newsru.com” saytına istinadən verdiyi məlumata görə, hesabatda ölkənin kompüter şəbəkələrinə terrorçular, cinayətkarlar və bəzi dövlətlərdən qaynaqlanan təhlükələr xüsusi qeyd edilir: ”Rusiya da daxil olmaqla, bəzi dövlətlər ABŞ-ın informasiya infrastrukturuna hücum etmək, onun normal fəaliyyətinə mane olmaq və bu yolla kəşfiyyat aparmaq üçün texniki imkanlara malikdir”.

“Rusiyada və Avrasiyada artan çağırışlar” başlıqlı bölümdə Rusiyanın mövcud beynəlxalq siyasi və iqtisadi düzəni dəyişmək istədiyi bildirilir: “Moskva Çin, İran və Venesuela kimi regional liderlərlə münasibətləri fəal şəkildə genişləndirir və təsir gücünü artırır. Rusiya Avropa və Şərqi Asiyada enerji nəqli marşrutları üzərində nəzarəti təmin etmək və möhkəmləndirməyə də çalışır. Moskva əmindir ki, Avropanın Rusiya qazından ciddi şəkildə asılılığı Rusiyanın siyasi və iqtisadi çəkisini artırır”.

Sənəddə postsovet məkanındakı situasiya da qiymətləndirilir və bu ərazidə “qaynar nöqtələr” kimi Abxaziya, Cənubi Osetiya, Qarabağ, Ukrayna, Belarus və Orta Asiya göstərilir. ABŞ kəşfiyyatı hesab edir ki, siyasi institutların zəifliyi, Rusiya ilə qaz münaqişəsi və dünya maliyyə böhranı üzündən Ukraynada inkişaf yavaş gedəcək. Belarusa gəldikdə isə Rusiyanın bu ölkə iqtisadiyyatının strateji sektorlarını nəzarətə götürmək istiqamətində davam edən cəhdləri Aleksandr Lukaşenkonu balans yaratmaq məqsədilə Qərblə münasibətləri yaxşılaşdırmağa sövq edə bilər. ABŞ kəşfiyyatı dövlət institutları zəif olan, sosial tarazlığın getdikcə pozulduğu və daha çox şəxslərə əsaslanan siyasət aparan 5 Orta Asiya respublikasını da qeyri-sabit zona sayır. Hesabatda deyilir ki, bu dövlətlər islam ekstremizmindən, aşağı iqtisadi inkişaf tempindən, su və ərzaq bölgüsü problemlərindən qaynaqlanan çağırışlarla bacarmaq üçün də kifayət qədər hazırlıqlı deyillər.

Hesabatda önəmli təhlükələr sırasında ekoloji, iqlim və qlobal səhiyyə problemləri də göstərilib: “Rusiya inkişaf etmiş sənaye ölkələri arasında əhalinin sağlamlığı baxımından ən pis göstəricilərə malikdir. Rusiyada uşaqların və gənclərin sağlamlıq səviyyəsi doğumun səviyyəsinin azalması ilə birlikdə ölkə silahlı qüvvələrinə kifayət qədər çağırışçının cəlb olunmasına təhlükə yaradır”.

ABŞ_Rusiya