MDB

Ana səhifə

MDB

Ermənistan müxalifəti İrəvanın mərkəzində mitinq keçirib

01 mart 2009 15:53 (UTC +04:00)

Meydanı əhatəyə alan polislər əvvəlcə aksiya iştirakçılarını əraziyə buraxmaq istəməsələr də, müxalifətçilərin axını hökumət qüvvələrini geri addım atmaq, aksiyanın keçirilməsinə razılıq vermək məcburiyyətində qoyub.

Mitinq 1 il əvvəl baş vermiş hadisələrdə həlak olanların xatirəsinin 1 dəqiqə sükutla yad edilməsi ilə başlayıb. Aksiyada çıxış edən müxalifətin və Erməni Milli Konqresinin lideri, eks-prezident Levon Ter-Petrosyan Ermənistan hakimiyyətini kəskin tənqid edib. O, ötən 1 il ərzində Ermənistan hakimiyyətinin insanlarının hüquqlarının təmin olunmasında, demokratiyanın inkişafında heç bir addım atmadığını, beynəlxalq təzyiqlərə baxmayaraq, siyasi məhbusların azadlığa buraxılmadığını, 1 il əvvəl baş vermiş qanlı olayların günahkarlarının tapılaraq cəzalandırılmadığını vurğulayıb. Bununla belə, Petrosyan müxalifətin inqilab etmək, fasiləsiz etiraz aksiyaları keçirmək və digər radikal addımlar atmaq niyyətində olmadığını da söyləyib: “Buz zorla qəsb edilmiş hakimiyyətin zorla devrilməsinin əleyhinəyik. Bizim yolumuz – konstitusion mübarizədir. Biz qanuni prezident seçkilərinin keçirilməsinə nail olacağıq. Bu hakimiyyət tezliklə öz-özünə məhv olacaq, müxalifətə birgə hökumət qurmağı təklif edəcək”.

L. Ter-Petrosyan müxalifətin növbəti aksiyasının mayın 1-də keçiriləcəyini elan edib.

Qeyd edək ki, ötən il fevralın 19-da Ermənistanda keçirilmiş prezident seçkilərində Serj Sarqsyanın qalıb elan olunmasına etiraz edən müxalifətin martın 1-də keçirilmiş aksiyasının hökumət qüvvələri tərəfindən dağıdılması zamanı 10 nəfər öldürülüb, 250-dən çox insan isə yaralanıb.