MDB

Ana səhifə

MDB

Tiflisdə aprelin 9-da keçiriləcək aksiyada 150 min nəfərin iştirakı gözlənilir

04 aprel 2009 10:12 (UTC +04:00)

Tiflis. Nizami Məmmədzadə-APA. Tiflisdə fəaliyyət göstərən 4 qeyri-hökumət təşkilatı aprelin 9-da müxalifət qüvvələrinin təşkil edəcəyi aksiya ilə bağlı birgə bəyanat veriblər.
APA-nın yerli bürosunun xəbərinə görə, “Gənc hüquqşünaslar assosiyasiyası,” “Beynəlxalq ictimaiyyət: ədalətli və demokratik seçkilər”, ”Gənc nəsil-yeni təşəbbüs,” ”Beynəlxalq şəffaflıq-Gürcüstan” adlı təşkilatlarının bəyanatında qeyd olunub ki, aksiyanın sülh şəraitində keçirilməsi Gürcüstanın sabitliyi və demokratiyanın genişləndirilməsi üçün vacib əhəmiyyət kəsb edir.
Adı çəkilən qurumlar Gürcüstan hakimiyyətini 9 aprel sülh aksiyasında vətəndaşların hüququnu təmin etməyə və orada qaldırılan məsələlərə diqqət yetirməyə çağırıblar. Onlar eyni zamanda mətbuat nümayəndələrini 9 aprel aksiyasını obyektiv və vaxtında işıqlandırmağa dəvət ediblər: “Biz ümid edirik ki, aksiya qanun çərçivəsində keçəcək və 2007-ci il 7 noyabrda buraxılan səhvlər təkrar olunmayacaq.”

Qeyd edək ki, dünən 9 aprel aksiyasının təşkilatçıları Tiflis merinə müraciət təqdim ediblər. Onlar müraciətlərindən 9 aprel aksiyasının keçiriləcəyi yerləri göstəriblər. Təşkilatçılar xəbərdarlıq ediblər ki, 9 aprel aksiyası Rustaveli prospektində - parlamentin qarşısında, Gürcüstanın İctimai Televiziyasının, Avlabar metrosunun, Tiflis Dövlət Universitetinin, prezidentin Avlabarda və Şavnabaddakı iqamətgahları qarşısında baş tutacaq. Müraciətdə qeyd olunub ki, aksiya aprelin 9-da saat 14.00-da başlayacaq və Mixail Saakaşvili istefa verənədək davam edəcək”.
Tiflis merinə çatdırılan müraciəti mitinq komitəsinin üzvlərindən Kaxa Kukava və Koka Qunsadze imzalayıblar.