MDB

Ana səhifə

MDB

Gürcüstan müxalifəti Mixail Saakaşvilini 1 sutka ərzində istefa verməyə çağırıb

09 aprel 2009 15:25 (UTC +04:00)

Çıxış etmək üçün ilk söz isə birləşmiş müxalifətin liderlərindən biri, prezidentliyə keçmiş namizəd Levan Qaçeçiladzeyə verilib. O, 9 aprelin Gürcüstanda faciə günü olduğunu xatırladaraq belə bir gündə prezident Mixail Saakaşvilinin istefasını tələb etdiklərini söyləyərək “Mişa, çıx get!” şüarını səsləndirib.

Parlamentin keçmiş sədri, Demokratik Hərəkat - Vahid Gürcüstan Partiyasının lideri Nino Burcanadzeyə söz verilərkən bəzi mitinq iştirakçıları onu fitə basıb. Mikrofona yaxınlaşan N. Burcanadze xalqdan üzr istəyib: “Bilirəm ki, məndən incimisiniz. Mən vəzifədə olarkən 2007-ci ilin 7 noyabrında sizi müdafiə edə bilmədim. İndi isə sizinləyəm və sona qədər sizinlə birlikdə qalacağam”. N. Burcanadze M. Saakaşvilini istefaya çağırıb: “Saakaşvili hələ də anlamayıb ki, xalqın qüruru var və müharibədə uduzan prezident istefaya getməlidir”.

“Vahid Gürcüstan Uğrunda Hərəkat” Partiyasının liderlərindən biri Eka Beseliya ölkə ərazisinin bir hissəsinin işğalına görə M. Saakaşvilinin məsuliyyət daşıdığını və onun iqtidardan kənarlaşdırılması üçün həlledici mübarizəyə qalxdıqlarını elan edib.

“Yeni sağlar”ın lideri David Qamkrelidze mitinqdə 150 min insanın iştirak etdiyini bəyan edib və onları əllərini açaraq havaya qaldırmağa çağırıb: “Bu gün bütün dünyanın diqqəti Tiflisə yönəlib. Xarici jurnalistlər bizdən hakimiyyəti güc yolu ilə ələ keçirməyə hazırlaşıb-hazırlaşmadığımızı soruşurlar. Əllərimizi havaya qaldıraraq göstərək ki, biz aksiyaya əliboş gəlmişik”.

Daha sonra “Gürcüstan Naminə Alyans”ın lideri İrakli Alasaniya, “Gürcüstanın yolu” Partiyasının lideri Salome Zurabişvili, Xalq Partiyasının lideri Koba Davitaşvili, Leyboristlər Partiyasının lideri Şalva Natelaşvili, məşhur gürcü şahmatçısı Nona Qaprindaşvili və başqaları çıxış edib. Mitinqdə prezident Mixail Saakaşviliyə müraciət qəbul olunub. Müraciətdə dövlət başçısından könüllü şəkildə hakimiyyətin konstitusion yolla dəyişməsi barədə qərar qəbul etməsi xahiş olunur. Təşkilatçılar mitinq iştirakçılarını 1 sutka sonra prezidentin qərarı ilə tanış edəcəklərini və sonrakı addımlar haqda qərar veriləcəyini açıqlayıblar. E. Beseliya bildirib ki, M. Saakaşvili istefa verməsə, müxalifət xalqı vətəndaş itaətsizliyinə çağıracaq.