MDB

Ana səhifə

MDB

«Yuxarı Lars nəzarət buraxılış məntəqəsinin açılması rus-gürcü-erməni maraqları dairəsində» adlı telekörpü keçirilib

09 mart 2010 19:33 (UTC +04:00)

Tiflis. Nizami Məmmədzadə-APA. Bu gün Gürcüstan paytaxtında RİA Novosti beynəlxalq mətbuat mərkəzində Tiflis-Moskva-İrəvan ekspertlərinin iştirakı ilə «Yuxarı Lars nəzarət buraxılış məntəqəsinin açılması rus-gürcü-erməni maraqları dairəsində» adlı telekörpü keçirilib. APA-nın Gürcüstan bürosunun məlumatına görə, tədbirdə Rusiya-Gürcüstan arasında Yuxarı Lars sərhədin açılmasından sonra iqtisadi-siyasi, eyni zamanda nəqliyyat sahəsində əməkdaşlığın inkişafı məsələləri müzakirə olunub.

Telekörpüdə Gürcüstan tərəfdən Qafqaz xalqları konfederasiyasının sədri Zaal Kasrelişvili, Gürcüstanda münaqişələrin həlli məsələləri üzrə keçmiş dövlət naziri, birləşmiş müxalifət liderlərindən biri olan Qoqi Xaindrava, Gürcüstan parlamentinin deputatı Nika Laliaşvili, Cənubi Qafqaz Regional Təhlükəsizlik institutunun direktoru Aleksandr Rusetski; Moskva tərəfdən Moskva Karneqi mərkəzinin elmi şurasının üzvü Aleksey Malışenko, tarix elmləri namizədi, politoloq, Beynəlxalq Əlaqələr İnstitutunun siyasi və hərbi analiz problemi şöbəsinin müdiri Serqey Markedonov; İrəvan tərəfdən Qafqaz institutunun direktoru Aleksandr İskandaryan və politoloq Aleksandr Markarov iştirak ediblər.

APA-nın məlumatına görə, ilk söz Moskva ekspertlərinə verilib. Aleksandr Malışenko məntəqənin açılışına pozitiv baxdığını bildirib. O, çıxışında Yuxarı Lars nəzarət-buraxılış məntəqəsinin siyasi motivlərə görə bağlandığını vurğulayıb. Malışenko eyni zamanda Larsın indi necə işləməsi barədə məlumatı olmadığını da deyib. «Rusiya-Gürcüstan arasında o qədər problemlər yaranıb ki, əgər biz əlaqələrin genişləndirilməsinə şərait yarada bilməsək, bu illərlə davam edə bilər», deyə o bildirib.

Serqey Markedonov isə bildirib ki, Yuxarı Larsın açılması Ermənistanı az da olsa iqtisadi cəhətdən gücləndirəcək: «Erməni nümayəndələrinin bu tele körpüdə iştirakı vacibdir, çünki, bir vaxtlar, yəni 2006-cı ildə Yuxarı Larsın bağlanması Ermənistanı kökündən sarsıtdı. İndi Yuxarı Larsda balaca bir pəncərə açılıb və biz bununla iqtisadi inkişaf olacağına inanırıq. Əgər gələcəkdə Gürcüstan öz siyasətində korrektə edərsə, Rusiya ilə bu ölkə arasında istilik əmələ gələr və təyyarə reysləri açılar, eyni zamanda viza rejimi də aradan götürülər».

Zaal Kasrelişvili isə bildirib ki, telekörpüdə Azərbaycan tərəfindən də nümayəndə iştirak etməli idi. «Bunu gələcəkdə nəzərə almaq lazımdır», deyə vurğulayıb.

Qoqi Xaindrava öz növbəsində viza olmadan sərhədi keçməyin çətin olacağını qeyd edib. «Rusiya bazarını Gürcüstan üçün bağlayıb. Yuxarı Lars yolu real olaraq Ermənistan üçün açılıb. Buradan yenə də Gümrü bazasına silah daşınması qaçılmazdır. Sxinvali tərəfdə hərbi baza tikilir. Ümumiyyətlə, Larsı açanda bizə dost ölkə olan Azərbaycanın fikrini də öyrənmək lazım idi. Azərbaycan bu məntəqədən hansı yüklərin daşınmasından narahatdır. Eyni zamanda gürcü ictimaiyyətinin də xəbəri olmalı idi. Biz bu işdə heç bir tərəqqi görmürük», deyə o bəyan edib.

Aleksandr Rusetski Rusiyanın Qafqazda öz siyasətini yeritmək istədiyini bildirib: «İndi canfəşanlıq edirlər ki, bu nəzarət-buraxılış məntəqəsi açılsın. Avqust müharibəsi zamanı Rusiya koridor vermədi».

Telekörpüdə Rusiyadan Gümrü bazasına silah-sursat və paltar və digər ərzaqların indi də daşınacağı qeyd olunub. Aleksandr İskandaryan deyib ki, 2006-cı ildən indiyədək Ermənistana silah daxil olub və indi də daxil olur.

Telekörpüdə «erməni soyqırımı» barədə də danışılıb. Moskva ekspertləri qeyd ediblər ki, ABŞ Nümayəndələr Palatasının Xarici Əlaqələr Komitəsində «soyqırım» barədə qətnamənin qəbulu Amerika-Türkiyə əlaqələrinə, eyni zamanda Ermənistan-Türkiyə proseslərinə təsir edəcək. Politoloq Aleksandr Markarov qeyd edib ki, bu məsələ Gürcüstan parlamentində də öz həllini tapacaq.

Jurnalistlərin «Yuxarı Larsın açılması Dağlıq Qarabağ münaqişəsinin həllinə təsir edəcəkmi» sualını nə Moskva tərəfi, nə də İrəvan tərəfi cavablandırmayıb.

Telekörpüdə Türkiyə-Ermənistan sərhədinin açılması, Cavaxetiyada vəziyyətin mürəkkəb olması, Türkiyə-Ermənistan-Gürcüstan-Rusiya əlaqələri və Avqust müharibəsi zamanı Ermənistan ərazisindən Gürcüstan ərazisinin bombalanması barədə də fikirlər söylənilib.

Telekörpüdə eyni zamanda Gürcüstan ekspertləri nəzarət-buraxılış məntəqəsinin açılmasının Gürcüstana heç bir xeyri olmadığını vurğulayıblar.