MDB

Ana səhifə

MDB

Gürcüstan prezidentinin anası və xanımı Tiflis şəhərində Novruz tədbirində iştirak ediblər

18 mart 2010 22:18 (UTC +04:00)

Tiflis. Nizami Məmmədzadə-APA. Tiflis şəhərindəki Krtsanisi restoranında M.F. Axundov adına Mədəniyyət Muzeyinin təşkilatçılığı və dəstəyi ilə Novruz bayramı münasibəti ilə tədbir keçirilib. APA-nın Gürcüstan bürosunun məlumatına görə, tədbiri mədəniyyət muzeyinin direktoru Leyla Əliyeva açaraq tədbirdə iştirak edən Gürcüstanın birinci xanımı Sandra Rulovsu, Gürcüstan prezidenti Mixail Saakaşvilinin anası Giuli Alasaniyanı və digər qonaqları salamlayaraq Novruz bayramı münasibəti ilə bütün Dünya azərbaycanlılarını, o cümlədən tədbirdə iştirak edən soydaşlarımızı təbrik edərək, onlara cansağlığı, əmin-amanlıq, sülh və uğurlar arzulayıb.

Bayram tədbirində Gürcüstanın birinci xanımı Sandra Rulovs İctimai televiziyanın Gürcüstan müxbiri Təhməz Təhməzova prezident Saakaşvilinin fərmanı ilə verilmiş «Şərəf» ordenini təqdim edib.

Tədbirdə Gürcüstan prezidentinin anası, «Gürcüstan-Azərbaycan»» Dostluq Evinin rəhbəri Giuli Alasaniya və Gürcüstan reinteqrasiya məsələləri üzrə dövlət nazirinin müavini Yelena Tevdoradze çıxış edərək T.Təhməzovu və ölkədə yaşayan azərbaycanlıları təbrik ediblər. G. Alasaniya çıxışında bildirib ki, azərbaycanlılar həmişə Gürcüstan dövlətçiliyinə sadiq olublar. O, vurğulayıb ki, prezident Saakaşvili martın 21-də Marneuliyə səfər edib, azərbaycanlıların bayramını təbrik edəcək. Tədbirdə Gürcüstan parlamentinin deputatı Azər Süleymanov, Tiflis şəhər merinin müavini Mamuka Axvlediani, ARDNŞ-nin Gürcüstan nümayəndəliyinin rəsmisi Arif Əliyev və başqaları çıxış edərək soydaşlarımızın Novruz bayramını təbrik ediblər.

Sonra «Sarvan» folklor rəqs ansamblının nümayiş etdirdiyi rəqsləri, ən başlıcası Azərbaycan xalq rəqsi olan «Sarı gəlin» rəqsini tədbir iştirakçıları alqışlarla qarşılayıblar.

Gürcüstan reinteqrasiya məsələləri üzrə dövlət nazirinin müavini Yelena Tevdoradze jurnalistlərə Azərbaycan xalqını Bahar bayramı münasibəti ilə təbrik etdiyyini bildirib. «Qoy həmişə bayram olsun, məhəbbət olsun. Mən dostum İlham Əliyevi bu bayram münasibəti ilə təbrik edirəm. Biz birlikdə Strasburqda Avropa yolu keçmişik. Dostluğumuz çox olub. Bir-birimizi başa düşmüşük. Mən ona uğurlar və Heydər Əliyevin xatirəsini həmişə əziz tutmağı və yaddan çıxartmamağı arzulayıram».

Giuli Alasaniya da jurnalistlərə bayram münasibəti ilə bütün Gürcüstan azərbaycanlılarını təbrik etdiyini bildiriib. «Bu çox yaxşı bayramdır. Mənim çox xoşuma gəlir ki, ölkəmizdə yeni adət-ənənələr, bayramlar meydana çıxır. Bu bayramlar bir-birimizlə ünsiyyət yaratmağa kömək edir. Biz bu bayramlarda əldə etdiyimiz uğurlara sevinirik və bir-birimizi təbrik edirik. Mən son illər azərbaycanlıların tədbirlərində müntəzəm iştirak edir və adət-ənənələrini çox sevirəm».

Gürcüstanın birinci xanımı Sandra Rulovs da Novruz bayramı münasibəti ilə xalqımızı təbrik edib. «Bilirəm ki, bu bayram bir neçə gün davam edəcək. Mən əvvəlcədən sizə uğurlar arzulayıram. Yaxşı ildir, gözəl yaz gəlir. Yeni il başlayır. Bu, çox mühümdür. Hər il biz Mehriban xanımla zəngləşirik. Hətta üç-dörd il əvvəl mən bir dəfə Novruz bayramında Azərbaycanda olmuşam. Mənim çox şirin xatirələrim var».